Олий суд расмий маълумотларига кўра, 2025 йил давомида мамлакат судларида жиноят ишлари катта ҳажмда кўриб чиқилган. Хусусан, 79 минг 554 нафар шахсга оид 63 минг 177 та жиноят иши суд муҳокамасидан ўтган.
Йил якунига кўра, жами 63 минг 340 нафар шахс судланган. Улардан 18 минг 816 нафари озодликдан маҳрум қилиш жазосига ҳукм қилинган. Қолган 43 минг 531 нафарга эса бошқа турдаги жазолар тайинланган. Яна 993 нафар шахс шартли ҳукм асосида жазолангани қайд этилган.
Статистикага кўра, судланганларнинг асосий қисми эркаклар — 55 минг 829 нафар. Аёллар сони 7 минг 511 нафарни ташкил этган. Ёшлар улуши ҳам сезиларли: 23 минг 973 нафар судланган шахс ёшлар ҳисобланади, шундан 2 минг 431 нафари вояга етмаганлар.
Шунингдек, 60 ёшдан ошган судланганлар сони 2 минг 830 нафар экани билдирилган. Яна бир муҳим рақам: 422 киши тўлиқ оқланиб, реабилитация қилинган.
Ярашув институтлари қўлланилиши натижасида 13 минг 224 нафар шахс жиноий жавобгарликдан озод этилган. Жиноят ишларининг энг катта қисми эса Тошкент шаҳри, Фарғона, Тошкент, Самарқанд ва Наманган вилоятларида кўриб чиқилган.
Қисқаси, рақамлар жуда “баланд”. Бу тенденция нимадан дарак беряпти — профилактика, ҳуқуқий маданият ва жамоат назоратини кучайтиришга эҳтиёж борлигини яна бир бор эслатяпти. Ҳаёт “судгача етиб бормасин” деган гап шунчаки мақол эмас экан.
“Zamin”ни Telegram'да ўқинг!
