Ўзбекистонда дам олиш кунлари ҳаво “илиқлик режими”дан секин-аста чиқиб, салқинроқ томонга бурилиши кутилмоқда. “Ўзгидромет” маълумотларига кўра, 20 февраль куни ҳали катта ҳудудларда қуруқ ва жуда илиқ об-ҳаво сақланиб туради, аммо 21 февраль атрофида нам ва салқин ҳаво оқими кириб келиши прогноз қилинган.
20 февраль, жума куни республика ҳудудининг асосий қисмида ёғингарчилик кузатилмайди. Кун ўртасида ҳаво ҳарорати 20–25 даража илиққача кўтарилиши кутилмоқда. Бу кўрсаткич қишнинг охирги ойига эмас, кўпроқ баҳорнинг ўрталарига хос. Фақат Қорақалпоғистон Республикаси ва Хоразм вилоятида, шунингдек, кечқурунга яқин Бухоро ҳамда Навоий вилоятларининг айрим жойларида ёмғир ёғиши мумкин. Республика шимолида эса ҳарорат 8–13 даража атрофида бўлади.
21 февраль, шанба куни Туркманистон томондан нам ва салқин ҳаво массалари кириб келиши айтилмоқда. Шу куни кечаси ва эрталаб Қорақалпоғистон ҳамда Хоразмдан ташқари кўпчилик ҳудудларда ёмғир ёғиши, айрим жойларда момақалдироқ кузатилиши мумкин. Фарғона водийсида эса ёмғир асосан эрталаб ва куннинг биринчи ярмида кутилмоқда.
Тоғолди ва тоғли ҳудудларда 21 февраль куни ёғингарчилик (ёмғир, қор) бўлиши, баъзи нуқталарда кучайиши эҳтимоли бор. Шу сабаб сел-сув тошқин ҳолатлари юзага келиши мумкин. Шамол тезлиги 7–12 м/с атрофида бўлади, айрим жойларда 13–18 м/с гача, баъзан 20–25 м/с гача кучайиши ҳам эҳтимолдан холи эмас.
21 февраль куни кундузи ҳарорат меъёрий қийматларгача пасайиб, 9–14 даража илиқ атрофида бўлиши кутилмоқда. 22 февраль, якшанба куни эса республика бўйича ёғингарчилик кутилмайди, ҳарорат яна 15–18 даража илиққача кўтарилиши прогноз қилинган.
Дам олиш кунлари кечаси ва эрталаб айрим жойларда туман тушиши мумкин.
Тошкент шаҳрида 20 февраль куни ҳарорат 22–24 даража илиқ бўлади. 21 февраль кечаси ва эрталаб ёмғир ёғиши, момақалдироқ бўлиши мумкин, кундузи эса ёғингарчилик кутилмайди. Ҳарорат 11–13 даража илиқ атрофида сақланади. 22 февраль куни ёғингарчилик прогноз қилинмаган, кечаси ва эрталаб туман тушиши мумкин. Ҳарорат кечаси 3–5, кундузи 14–16 даража илиқ бўлади.
