Баҳор фасли кириб келганига қарамай, Ўзбекистонга қиш яна қайтмоқда. Синоптиклар 9 март кунидан бошлаб республика ҳудудига совуқ ва нам ҳаво массалари кириб келишини маълум қилди. Ушбу ўзгаришлар натижасида мамлакат бўйлаб ёғингарчиликлар кузатилади.
9 мартдан 11 мартга қадар республиканинг кўплаб ҳудудларида ёмғир ёғиши, баъзи жойларда эса қорга айланиши кутилмоқда. Тоғли ва тоғолди ҳудудларда ёғингарчиликлар кучли бўлиши мумкин. Шунингдек, шамол тезлиги секундига 15 дан 20 метргача, айрим жойларда эса 25 метргача кучайиши прогноз қилинмоқда.
Ҳароратнинг кескин пасайиши 10 мартдан 12 март кунларига тўғри келади. Шимолий ҳудудларда кечаси 7 дан 10 даражагача совуқ, кундузи эса 0 дан 3 даражагача совуқ бўлиши кутилмоқда. Қолган ҳудудларда эса кечаси 0 дан 3 даражагача совуқ, кундузи эса 2 дан 5 даражагача илиқ ҳарорат кузатилади.
Мутахассислар аҳолини об ҳаво ўзгаришларига тайёр туришга чақирмоқда. Фуқаролардан иссиқ кийимларни ҳозирлаб қўйиш, зарур захираларни текшириш ҳамда тоғли ҳудудларга боришни вақтинча чеклаш тавсия этилади. Об ҳаво шароитлари туфайли йўлларда эҳтиёткор бўлиш сўралади.
“Zamin”ни Telegram'да ўқинг!
