Тошкент шаҳрининг бош режаси янги босқичга кўтарилмоқда. Шаҳар инфратузилмасини ривожлантириш ва аҳоли учун қулай шароитлар яратиш мақсадида умумий қиймати 16,2 миллиард долларга тенг бўлган 31 та йирик лойиҳа тасдиқланди. Ушбу ўзгаришлар пойтахт қиёфасини замонавий талаблар асосида шакллантиришга хизмат қилади.
Тасдиқланган дастурга кўра, лойиҳаларнинг асосий қисми, яъни 28 таси замонавий турар жой мажмуалари ҳамда аҳолига хизмат кўрсатиш объектларини барпо этишга қаратилган. Шунингдек, шаҳарда 5 та янги меҳмонхона, 2 та йирик бизнес маркази, савдо ва ишбилармонлик мажмуалари, замонавий тиббиёт маркази ҳамда талабалар учун қулай ётоқхоналар қурилиши кўзда тутилган.
Шаҳарсозлик сиёсатидаги янгиликлар фақат қурилиш билан чекланиб қолмайди. Бош режага киритилган ўзгартиришларга биноан, 203 та ҳудудда реновация, 46 та ҳудудда реконструкция ҳамда 23 та ҳудудда консервация стратегиялари амалга оширилади. Бу чора-тадбирлар пойтахтнинг тарихий ва замонавий қисмларини уйғунлаштириш ҳамда шаҳар ҳудудларидан самарали фойдаланиш имконини беради.
“Zamin”ни Telegram'да ўқинг!
