Тошкент шаҳрининг Сергели туманида аҳоли ва айниқса болалар учун хавф туғдираётган канал устидан ўтиш жойи бўйича расмийлар муносабат билдирди. Аввалроқ маҳаллий аҳоли канални кесиб ўтиш учун коммуникация қувурларидан фойдаланишга мажбур бўлаётгани ҳақида хабарлар тарқалган эди. Ушбу ҳолат жамоатчиликда ҳақли эътирозларни келтириб чиқаргач, туман ҳокимлиги масъуллари воқеа жойига чиқиб, вазиятни ўрганди.
Ўрганиш натижаларига кўра, ҳудудда хавфсизликни таъминлаш мақсадида тезкор чоралар кўришга қарор қилинди. Ҳозирча ўтиш жойини бутунлай ёпиб қўйиш ўрнига, уни вақтинча тартибга келтириш ва ободонлаштириш ишлари олиб борилади. Хусусан, кенг кўламли қурилиш ишлари бошлангунга қадар қувурлар устидан ўтиш жойи махсус ҳимоя тўсиқлари билан жиҳозланади. Бу эса пиёдаларнинг, айниқса мактаб ўқувчиларининг канални хавфсиз кесиб ўтишига имкон беради.
Келгусида ушбу ҳудудда пиёдалар ва транспорт воситалари учун замонавий ҳамда тўлиқ талабларга жавоб берадиган янги кўприк қурилиши режалаштирилган. Мутасаддилар мазкур лойиҳа босқичма-босқич амалга оширилишини ва аҳоли учун қулай шароитлар яратилишини маълум қилди. Айни пайтда ҳудуддаги ишлар назоратга олинган бўлиб, хавфсизлик чоралари кучайтирилмоқда.
“Zamin”ни Telegram'да ўқинг!
