Статистика агентлиги маълумотларига кўра, 2025 йилда Тошкент шаҳрида таълим хизматларининг умумий ҳажми 18,8 триллион сўмни ташкил этди. Ушбу кўрсаткич бўйича пойтахт туманлари орасида Чилонзор тумани мутлақ етакчига айланди. Туманда кўрсатилган таълим хизматлари ҳажми 2,99 триллион сўмга етган.
Рейтингнинг юқори поғоналаридан Юнусобод ва Олмазор туманлари ҳам жой олди. Уларнинг кўрсаткичлари мос равишда 2,19 триллион ҳамда 2,15 триллион сўмни ташкил қилади. Мутахассисларнинг таъкидлашича, ушбу ҳудудларда таълим бозорининг бундай юқори бўлиши олий ўқув юртлари, хусусий мактаблар ва турли ўқув марказларининг кўплиги билан бевосита боғлиқ.
Бошқа туманлар кесимида Мирзо Улуғбек тумани 1,77 триллион сўм, Миробод тумани 1,48 триллион сўм, Шайхонтоҳур тумани 1,41 триллион сўм ва Яккасарой тумани 1,08 триллион сўм натижа қайд этган. Бу ҳудудларда ҳам таълим соҳаси барқарор ривожланиб бормоқда.
Таълим хизматлари энг кам кўрсатилган ҳудудлар қаторига эса Сергели, Янгиҳаёт ва Бектемир туманлари киритилди. Хусусан, Сергели туманида бу кўрсаткич 291,9 миллиард сўмни, Янгиҳаёт туманида 213,1 миллиард сўмни ташкил этган бўлса, энг паст натижа Бектемир туманида кузатилди. Бу туманда таълим хизматлари ҳажми бор-йўғи 43,8 миллиард сўмга тенг бўлган.
“Zamin”ни Telegram'да ўқинг!
