“Янги авлод тадбиркорлари” дастури ишга туширилади
Ўзбекистонда “Янги Ўзбекистон ёшлари – 2030” стратегияси доирасида ёшларнинг тадбиркорлик салоҳиятини оширишга қаратилган “Янги авлод тадбиркорлари” дастури ишга туширилмоқда. Мазкур лойиҳа доирасида 2030 йилгача 20 минг нафар ёш маҳаллий ва хорижий экспертлардан бизнес юритиш ҳамда лойиҳаларни кенгайтириш сирларини ўрганади. Ўқиш якунида энг юқори натижа кўрсатган 1 минг нафар иштирокчига Марказий банк ставкасининг 50 фоизи миқдорида имтиёзли кредитлар ажратилади. Шунингдек, дастур доирасида янги фермер хўжаликларини ташкил этиш ва инфратузилма харажатларини давлат томонидан қисман қоплаш кўзда тутилган.
2026 йил 20 апрелда қабул қилинган янги қарорга мувофиқ “Янги авлод тадбиркорлари” дастури ишга туширилади, деб Uza.uz хабар берди. Ушбу дастур “Янги Ўзбекистон ёшлари – 2030” стратегияси доирасида амалга оширилиб, ёшларнинг бандлигини таъминлаш ва тадбиркорлик салоҳиятини оширишга қаратилган.
Дастур доирасида 2030 йилгача 20 минг нафар ёш тадбиркорликка ўқитилади. Улар маҳаллий ва хорижий экспертлар иштирокида махсус таълимдан ўтади. Шунингдек, хусусий сектор билан ҳамкорлик йўлга қўйилиб, амалий бизнес кўникмаларни шакллантиришга алоҳида эътибор қаратилади. Тренинглар бизнес лойиҳа яратиш, бозорга чиқиш ва уни кенгайтириш каби йўналишларни қамраб олади.
Дастур якунида тест синовлари ўтказилиб, энг юқори натижа кўрсатган 1 минг нафар ёшга сертификат берилади. Ушбу сертификат асосида уларга 3 йилгача муддатга, 6 ой имтиёзли давр билан ва Марказий банк ставкасининг 50 фоизи асосида кредитлар ажратилади. Шу билан бирга, янги фермер хўжаликлари ва инфратузилма харажатлари ҳам давлат томонидан қисман қопланади.
Изоҳлар 0
…