Давлат активларини бошқариш агентлиги Тошкент шаҳрининг Яшнобод туманида жойлашган бинолар мажмуасини сотувга қўйди. Ушбу объект бўйича маълумотлар Э-аукцион электрон савдо платформасида эълон қилинди. Бу ҳақда Spot.uz хабар беради.
Ер участкаси Элбек кўчаси бўйлаб, "Ўздонмахсулот" компаниясининг ун заводи ва Тошкент механика заводи ҳудуди оралиғида жойлашган. Мазкур ҳудуд "Машинасозлар" метро бекати яқинида бўлиб, ҳозирда у ерда омборхоналар мавжуд.
Мажмуанинг умумий майдони 2,59 гектарни ташкил этади. Ундаги омборлар ва ёрдамчи объектларнинг майдони 4 729 квадрат метрга тенг. Ҳудуд сув ва электр энергияси билан таъминланган.
Лотнинг бошланғич нархи 241,85 млрд сўм этиб белгиланган. Савдолар 25 май куни соат 10:00 да бўлиб ўтади, аризалар эса шу куни соат 9:00 га қадар қабул қилинади. Ушбу объект президент томонидан 2023 йил март ойида тасдиқланган хусусийлаштириш дастури доирасида сотилмоқда.
“Zamin”ни Telegram'да ўқинг!
