Қашқадарё ва Сурхондарёда картошка нархи кескин қимматлашди
Ўзбекистоннинг айрим ҳудудларида, хусусан Қашқадарё ва Сурхондарё вилоятларида картошка экиш ишлари режадан анча ортда қолмоқда. Бундай сусткашлик оқибатида март ойида ушбу вилоятларда картошка нархи 9 фоиздан 12,4 фоизгача қимматлашгани кузатилди. Ишларни ташкил этишда камчиликка йўл қўйган масъулларга нисбатан чоралар кўрилиб, соҳадаги муаммоларни тезкор бартараф этиш бўйича топшириқлар берилди. Президент Шавкат Мирзиёев озиқ-овқат хавфсизлигини таъминлаш учун барча ресурслар етарли эканини ва нархлар барқарорлигини сақлаш зарурлигини таъкидлади.
Ўзбекистонда жорий йилда картошкага бўлган ички талабни тўлиқ қоплаш мақсадида 180 минг гектар ер ажратиш режалаштирилган эди. Ҳозирги кунга қадар ушбу майдонларнинг 118 минг гектарига уруғлик экиш ишлари якунланди. Бироқ айрим ҳудудларда бу борадаги кўрсаткичлар кутилганидан анча паст бўлиб қолмоқда.
Хусусан, Қашқадарё вилоятида режалаштирилган майдонларнинг бор-йўғи 41 фоизига, Сурхондарё вилоятида эса 44 фоизига картошка экилган. Экиш ишларининг кечикиши бозорлардаги нарх-навога ҳам салбий таъсир кўрсатди. Март ойининг ўзида картошка нархи Сурхондарёда 12,4 фоизга, Қашқадарёда эса 9 фоизга кўтарилгани қайд этилди.
Картошкачиликка ихтисослашган Хўжаобод, Андижон, Косонсой, Чортоқ, Чуст, Янгиқўрғон, Тошлоқ ва Фарғона туманларида ҳам ишлар қониқарсиз деб топилди. Сусткашликка йўл қўйган вилоят ҳокимларининг қишлоқ хўжалиги бўйича ўринбосарлари ҳамда туман ҳокимларининг масъулиятини ошириш бўйича топшириқлар берилди.
Президент Шавкат Мирзиёев озиқ-овқат хавфсизлиги масаласига тўхталиб, барча ресурслар мавжудлигини таъкидлади. «Такрор айтаман: маблағ бор, ресурс бор. Гўшт ва картошкадан ҳеч қандай масала бўлмаслиги керак», — дея қайд этди давлат раҳбари.
Изоҳлар 0
…