Ўзбекистонда кўп квартирали уйлар атрофида автомобилларни нотўғри жойлаштиришга қарши қатъий чекловлар жорий этилди. Янги қоидаларга кўра, энди машиналарни тротуарлар, подъездлар олди ва бошқа умумий фойдаланиш ҳудудларига қўйиш ман этилади.
Мазкур талаблар Адлия вазирлиги томонидан 29 апрель куни давлат рўйхатидан ўтказилган “Кўп квартирали уйларни сақлаш ва улардан фойдаланиш қоидалари”да белгилаб қўйилди.
Қоидаларга биноан, автотранспорт воситаларини уйларга туташ ҳудудлардаги майсазорлар, хиёбонлар, болалар майдончалари, шунингдек тротуарлар ва кириш йўлаклари қаршисига қўйиш тақиқланади. Бу чекловлар ҳовлиларда ҳаракат хавфсизлигини таъминлаш ва умумий жойларни асраш мақсадида киритилган.
Шу билан бирга, янги тартибда бир қатор бошқа тақиқлар ҳам назарда тутилган. Жумладан, балкон ва лоджияларга ёнғин хавфини келтириб чиқарувчи ускуналар ўрнатиш, уларда оғир буюмларни сақлаш мумкин эмас. Шунингдек, балконларнинг ташқи қисмига кийим-кечак, гилам ёки бошқа буюмларни илиб қўйиш ҳам тақиқланади (ички қисми бундан мустасно).
Уй ҳайвонларини зинапоялар, ертўлалар, чордоқлар ва бошқа умумий жойларда сақлашга ҳам рухсат берилмайди. Бундан ташқари, зина майдончаларида ёки зинапоя остида ёнувчан материалларни қолдириш, шунингдек иссиқлик тизимларига ўзбошимчалик билан ўзгартиш киритиш ман этилади.
Янги қоидаларда санитария ва техник хизмат кўрсатиш масалаларига ҳам алоҳида эътибор қаратилган. Хусусан, лифт хоналари ҳар ҳафта тозаланади ва лифт ускуналари мунтазам техник назоратдан ўтказилади.
Шунингдек, агар ертўлада қувур аварияси юз бериб, сув ёки оқова тўпланса, бошқарув органи 24 соат ичида ушбу муаммони бартараф этиши шарт қилиб белгиланди.
Мутахассислар фикрича, мазкур янгиликлар кўп квартирали уйларда тартиб-интизомни кучайтириш, тозаликни сақлаш ва аҳоли учун хавфсиз муҳит яратишга хизмат қилади.
