Leapmotor электромобиллари атрофидаги шовқин: Ўзбекистонда сертификат олиш тўхтатилди

Хитойнинг электромобиллар ишлаб чиқарувчи Leapmotor бренди Ўзбекистонда техник чекловларга дуч келди. Мамлакатда ушбу брендга тегишли енгил автомобилларни сертификатлаш жараёни вақтинча тўхтатилди.

С16 моделда аниқланган жиддий камчилик

Назорат органлари маълум қилишича, Leapmotor S16 автомобили электрон мослашувчанлик бўйича тестда нормаларга жавоб бермаган. Аниқланишича, ушбу автомобилда ҳосил бўладиган электромагнит шовқин даражаси рухсат этилган чегарадан 16 баробар юқори бўлган.

Бу ҳолат Техник жиҳатдан тартибга солиш соҳасида назорат инспекциясининг расмий баёноти орқали маълум қилинди. Бу каби камчиликлар транспорт воситасининг бошқа электрон тизимларига таъсир қилиши мумкинлиги боис, хавфсизлик нуқтаи назаридан жуда жиддий баҳоланмоқда.

Leapmotor’дан расмий жавоб келди

Ҳолат юзасидан Leapmotor расмий муносабат билдирди. Компания вакиллари қуйидагиларни маълум қилди:

“Ўзбекистонда текширувдан ўтказилган автомобил биз томонимиздан юборилмаган. Шунингдек, текширув шартлари ва танланган машина ҳолати ҳақида аниқ маълумотлар мавжуд эмас. Бизда натижаларга нисбатан эътирозлар бор. Шу боис, шаффоф ва қайта текширув ўтказилишини хоҳлаймиз, — дейилади баёнотда.

Нима бўлади энди?

Leapmotor томони вазиятни расмий каналлар орқали ҳал қилишга, техник талабларга жавоб бериш бўйича ҳамкорлик қилишга тайёр эканини билдирган. Айни пайтда эса Ўзбекистонда ушбу бренд остидаги янги машиналарни расмий тарзда рўйхатдан ўтказиш ва сертификатлаш жараёни тўхтатилган.

Эслатма:
Leapmotor — Хитойнинг сўнгги йилларда оммалашган электромобил брендларидан бири бўлиб, дунёнинг кўплаб мамлакатларида ўз моделлари билан иштирок этмоқда. Ўзбекистонда ҳам мазкур брендга қизиқиш ортиб бораётган эди.

Сизнингча, электрон шовқин каби камчиликлар электромобиллар ишончини пасайтирадими?

Фикрингизни изоҳда қолдиринг! Zamin.uz янгиликларни кузатиб боради.