Сеат компанияси ишлаб чиқариш харажатлари камайиши билан ўзининг янги электромобилларини тақдим этишни режалаштирмоқда. Компания раҳбариятининг таъкидлашича, бренд шунчаки Cupra моделларини қайта жиҳозлаш билан чекланиб қолмайди, балки келажакда бутунлай алоҳида моделлар қаторига эга бўлади. Бу ҳақда Autocar.co.uk хабар беради.
Яқинда Сеат узоқ танаффусдан сўнг Ибиза супермини ва Арона кроссоверининг янгиланган версияларини намойиш этди. Бу 2020-йилда тўртинчи авлод Леон модели чиққанидан бери брендга киритилган биринчи йирик сармоядир. Келаси йили ушбу моделлар учун янги милд-ҳйбрид двигателлари ҳам тақдим этилиши кутилмоқда.
Ҳозирда Атека ва Таррако СУВ моделлари ишлаб чиқаришдан олингани сабабли, Сеат қатори фақат учта бензинли модел билан чекланган. Компания асосий ресурсларни тез ривожланаётган Cupra брендига йўналтираётган бўлса-да, бош директор Маркус Ҳаупт Сеат бренди ҳали ҳам компания учун муҳим мерос эканлигини ва унга сармоя киритиш давом этишини таъкидлади.
Ҳауптнинг сўзларига кўра, 2029-2030 йилларга бориб КО2 эмиссияси бўйича талаблар қатъийлашганда, бренднинг келажаги ҳақида жиддийроқ муҳокамалар бошланади. Ҳозирги вақтда электромобил платформаларининг юқори нархи Сеат каби ҳамёнбоп брендлар учун асосий тўсиқ бўлиб қолмоқда, бироқ харажатлар камайиши билан вазият ўзгариши мумкин.
Сеат ва Cupra брендлари бутунлай бошқа мижозлар қатламига ва бозор позициясига эга. Сеат асосан ички ёнув двигателли ва ҳамёнбоп автомобилларга эътибор қаратади, бу эса электрлаштириш жараёни секин кечаётган Европадан ташқаридаги бозорлар учун жуда муҳимдир.
“Zamin”ни Telegram'да ўқинг!
