Арестович уруш бошидан буён 10 мингга яқин украин ҳарбийси ҳалок бўлганини тасдиқлади

^{Фото: УНИАН}
Украина президенти офиси раҳбари маслаҳатчиси Алексей Арестович уруш бошидан буён 10 минггача украин ҳарбий хизматчиси ҳалок бўлганини тасдиқлади.

«Бизда можаро бошланганидан буён кунига ўртача 100 [киши] қурбон бўлмоқда. Аммо Россия армиясида урушнинг дастлабки 20-30 кунлигида ҳар куни ўртача 1000 [киши] ҳалок бўлганди. Ҳозирда камида 200-300 [россиялик] ҳалок бўлмоқда», — деган Арестович журналист Марк Фейгин билан суҳбатда.

Фейгиннинг бундай ҳисобдан келиб чиққан ҳолда, Украина армияси 10 минг жангчисини йўқотгани ҳақида айтиш мумкинми, деб сўраганида, Арестович шундай жавоб қайтарди: «Ҳа, тахминан шундай».

Украина ҳукумати сўнгги бор жами йўқотишлар сонини 16 апрел куни очиқлаганди. Ўшанда президент Володимир Зеленский CNN мухбирига уруш вақтида 2500 нафардан 3000 нафаргача украин ҳарбийси ҳалок бўлгани, яна 10 мингга яқини яраланганини айтганди.

10 июн куни Украина президенти офиси маслаҳатчиси Михаил Подоляк урушда ҳар куни 100 нафардан 200 нафаргача украин ҳарбийси ҳалок бўлганини айтди. Бу украин расмийлари томонидан ҳар кунлик йўқотишлар бўйича берилган энг юқори кўрсаткич эди.

Россия мудофаа вазирлиги икки бор россиялик ҳарбийларнинг йўқотишлари тўғрисида маълумот берган, охиргиси — 25 март куни берилган. Ўшанда Украинада «махсус амалиёт» бошланганидан буён 1351 нафар россиялик ҳарбий ҳалок бўлиб, яна 3825 киши яралангани айтилганди.
BBC рус хизмати 10 июн ҳолатига кўра Россияда ҳудудий расмийлар томонидан эълон қилинган маълумотлар асосида урушда 3500 нафардан ортиқ ҳарбий ҳалок бўлганини хабар қилган.

Янгиликлар