Еврокенгаш раҳбари Украинага танклар етказиб беришни қўллаб-қувватлади

^{Шарл Мишел / Фото: Getty Images}
Европарламентда сўзга чиққан Европа кенгаши раҳбари Шарл Мишел Украинага танклар берилишини қўллаб-қувватлади. Унинг эслашича, қарийб бир йилдан бери Россия украиналикларни бомбалар ёрдамида бўйсунишга мажбурлаш мақсадида фалокат ва террор стратегиясини амалга оширмоқда.

«Биз Бахмутда, Соледарда, Днипродаги охирги ҳолатда бундай ёндашувни кўрмоқдамиз. Аммо украиналиклар қаршилик кўрсатмоқда ва курашишда давом этадилар. Биз, Европа Иттифоқи, керак бўлганда уларни қўллаб-қувватлашда давом этамиз. Европа тинчликни сақлаш жамғармасини кенгайтириш орқали ҳарбий қўллаб-қувватлашни давом эттирамиз. Ҳаракат қилиш вақти келди», деди у.

Мишел Украинага зудлик билан кўпроқ қурол етказиб бериш лозимлигини таъкидлади. «Шахсан мен Украинага танклар тақдим этиш тарафдориман», — деди у.

Полша Ғарбнинг оғир жанговар танкларини Украинага жўнатишини эълон қилган биринчи НАТО давлати бўлди. 11 январь куни кечқурун халқаро коалиция таркибида Leopard-2 танклари ротасини Киевга ўтказиш тўғрисидаги қарорни Полша президенти Анжей Дуда Украина ва Литва президентлари Володимир Зеленский ҳамда Гитанас Науседа билан Лвовдаги учрашувдан сўнг эълон қилди.

Гап 14 та танк ҳақида кетмоқда. Дуданинг баёнотига қарамай, Полша ҳали танкларни юбора олмайди, чунки бу уларни ишлаб чиқарувчи - Германиядан реэкспорт лицензиясини талаб қилади.

Берлин бунга ҳали тайёр эмас. Федерал канцлер матбуот котиби Штеффен Ҳебештрайт чоршанба куни кечқурун Германиянинг реэкспортга қарши позицияси ўзгармаганини айтди. Ҳебештрайт, шунингдек, НАТО иттифоқчиларининг реэкспорт сўровларидан ҳам, Украинага тўғридан тўғри Германиядан танклар юбориш таклифларидан ҳам бехабар эканлигини таъкидлади.

Янгиликлар