Байдендан Трампни енгиш режаси талаб қилинди

^{Фото: AP}
АҚШинг йирик касаба уюшмалари мамлакат президенти Жо Байденнинг сайловолди кампанияси расмийларидан собиқ президент Дональд Трампни мағлуб этиш режасини тақдим этишни талаб қилди. Бу ҳақда Тhе Washington Post хабар берди.

"10 июль куни бўлиб ўтган ёпиқ йиғилишда мамлакатнинг аксар меҳнат етакчилари, хусусан, Байденнинг қизғин тарафдорлари Байден сайловолди кампанияси расмийларидан уларга Трампни мағлуб этиш режасини тақдим этишни қайта-қайта сўрашди", — деб ёзади нашр.

Бу масала бўйича стюардессалар ассоциацияси президенти Сара Нелсон ва Бирлашган автомобиль саноати уюшмаси президенти Шон Фейн энг қатъий талаб билан чиққан. Нашрга кўра, улар Байденнинг касаба уюшмалари орасидаги энг йирик иттифоқчиларидир.

Суҳбатлардан хабардор демократ амалдорлардан бири юқори лавозимдаги сайловолди ташвиқоти ходимларининг аксарияти тушкунликка тушиб, олдинга йўлни кўрмаётганини таъкидлаган.

АҚШ президентлигига даъвогарлар Жо Байден ва Дональд Трамп ўртасидаги илк дебат 28 июнь куни Атлантада бўлиб ўтган эди. Байден дебат давомида дудуқланиб, фикрларини аниқ ифода эта олмаган ва баҳс охирида рафиқаси Жилл ёрдамида саҳнадан тушган.

Америкалик сиёсатчилар ва журналистлар Демократик партия Байдендан воз кечиб, бошқа номзод кўрсатиши мумкинлигини тахмин қилмоқда. Байден ва Трампнинг иккинчи дебати 10 сентябрга белгиланган. АҚШда президентлик сайловлари 5 ноябрь куни бўлиб ўтиши кутилмоқда. “Замин” янгиликларини “Telegram”да кузатиб боринг