Трамп президентлик сайловида ғалаба қозонса Илон Маскка Оқ уйдан лавозим таклиф қилади

^{Фото: AP}
Республикачилар партиясидан АҚШ президентлигига номзод Доналд Трамп ҳокимиятга қайтадиган бўлса миллиардер Илон Маскка Оқ уйдан лавозим таклиф этишга тайёр. Бу ҳақда у Reuters’га берган интервюси давомида, журналистнинг сайловлардаги ғалабасидан кейин Маскни вазир ёки маслаҳатчи этиб тайинлаш нияти бор ёки йўқлиги борасидаги саволига ижобий жавоб қайтарди.

«У жуда ақлли инсон. У рози бўлса, мен, албатта, бу ишни қиламан. У тенги йўқ йигит», — дейди АҚШнинг собиқ президенти.

Ушбу интервю эълон қилинганидан кўп ўтмай Илон Маск ўзининг Х’даги саҳфасига «Мен хизмат қилишга тайёрман», деб ёзиб қолдирди. У ўз твитига нейротармоқ ёрдамида ўзгартирилган ўзининг суратини илова қилган — унда Маск «Ҳукумат самарадорлиги департаменти» ёзуви туширилган минбарда турибди.

Маск ва Трамп муносабатлари

Март ойида Маск на Доналд Трампнинг ва на унинг ўша вақтдаги рақиби Жо Байден кампаниясига хайрия қилмаслигини таъкидлаган эди. Аммо июл ойида Трампга уюштирилган суиқасддан кейин Маск расман унинг сайловолди пойгасини қўллаб-қувватлади. Бизнесмен АҚШнинг анчадан буён «бунақа чўрткесар» номзоди бўлганини маълум қилди. Ўша ойнинг ўзида The Wall Street Journal миллиардер республикачини қўллаб-қувватлайдиган America PAC қўмитасига ҳар ой 45 миллион долларга яқин пул ўтказишни режалаштираётгани ҳақида ёзди.

12 август куни Доналд Трамп Илон Маскка тегишли бўлган Х ижтимоий тармоғига қайтди. У ерга президентликка номзод ўзининг сайловолди ролигини жойлаштирди. Шунингдек, сиёсатчи Маскка икки соатли интервью ҳам берди.

Илон Маск ҳозирда дунёнинг энг бадавлат инсони ҳисобланади. Турли ҳисоб-китобларга кўра, унинг бойлиги 245-248 миллиард доллар атрофида. “Замин” янгиликларини “Facebook”да кузатиб боринг