Янги Орлеанда автомобиль оломонни босиб кетди, қурбонлар бор...

^{Фото: AP}
Янги йилнинг дастлабки соатларида Янги Орлеандаги Канал-стрит ва Бурбон-стрит кўчалари кесишмасида автомобиль ҳайдовчиси оломонга қарата ҳайдаши оқибатида ўн киши ҳалок бўлди, 30 киши жароҳат олди.

Аввалроқ Янги Орлеан полицияси кўплаб қурбонлар, жумладан, ўлим билан якунланган ҳодиса содир бўлганини маълум қилган эди. NOLА Ready нашри одамларга бу ҳудуддан узоқроқ туришни тавсия қилган. Агентликнинг маълум қилишича, жароҳатланганлар 5 та маҳаллий шифохонага етказилган.

Ҳодиса Янги Орлеандаги Янги йил байрами якунида ва минглаб томошабинлар иштирок этиши кутилаётган АllState Bowl футбол чорак финали бошланишидан бир неча соат олдин содир бўлган.

“Бугун эрталаб Бурбон стритда даҳшатли зўравонлик ҳодисаси содир бўлди”, деди Луизиана штатининг губернатори Жефф Ландри Х ижтимоий тармоғида, шунингдек, одамларни ҳужум содир бўлган ҳудуддан узоқроқ туришга чақирди.
Янги Орлеан шаҳри мери ЛаТоя Кентрелл воқеани очиқчасига “теракт” деб атаган.

Полиция вакиллари мазкур ҳужум имкон қадар кўпроқ одамларга зарар етказиш мақсадида олдиндан режалаштирилгани ҳамда қасддан амалга оширилганини расман тасдиқлаган. Воқеа жойида портловчи қурилмаларга ўхшаш буюмлар ҳам топилган, бироқ улар ҳақиқий қурилмалар ёки муляжлар эканлиги ҳозирча аниқ эмас.

CBS News телеканали гувоҳларга таяниб, юк машинаси катта тезликда оломонга қарата ҳайдагани, шундан сўнг ҳайдовчи машинадан тушиб, қуролдан ўқ узганини, полиция эса жавоб ўқ узганини хабар қилган.

Бир жуфт гувоҳнинг CBS News’га айтишича, улар ўзлари турган кўчадан узоқда гумбурлаган овозни эшитишган ва кейин оқ юк машинаси юқори тезликда баррикадани ёриб ўтаётганини кўришган. “Замин” янгиликларини “Telegram”да кузатиб боринг