Америкалик астронавтлар космик станция бортидан яна очиқ космосга чиқди

^{Фото: NASA}
Америкалик астронавтлар очиқ космосдаги бир неча соатлик ишлардан кейин Халқаро космик станция (ХКС) бортига қайтди, деб хабар беради NASA.

Станция командири Сунита Уилямс ва бортмуҳандис Бутч Уилмор соат 07:43 да Quest шлюзи орқали космик вакуумга чиққан. Улар 5,5 соат давомида техник ишларни олиб борган. Бу вақт давомида астронавтлар раиоантенна тугунини демонтаж қилган ва станция корпусида микроблар қидириш билан шуғулланган.

16 январ куни ҳам ушбу астронавтлар бир неча соатга очиқ космосга чиқиб, астрофизик ускуналарга хизмат кўрсатган эди.

Халқаро космик станцияда ҳозирда етти кишидан иборат экипаж фаолият юритмоқда — «Роскосмос» космонавтлари Алексей Овчинин, Иван Вагнер ва Александр Горбунов, NASA астронавтлари Ник Хейг, Доналд Петтит, Бутч Уилмор ва Сунита Уилямс.

Эслатиб ўтамиз, ХКС бортидаги америкалик астронавтлар Трейси Дайсон ва Меттю Доминик 13 июнда космик вакуумга чиқиши керак бўлган, аммо скафандр билан боғлиқ муаммолар туфайли жараён бекор қилинган эди. 24 июнда астронавтлар очиқ космосга 31 дақиқага чиққан ва Дайсон скафандридаги совитиш контуридан сув оққани сабаб станцияга қайтишга мажбур бўлганди. “Замин” янгиликларини “Telegram”да кузатиб боринг