Фото: Maxym Marusenko / NurPhoto via Getty Images
АҚШ Украинага таклиф қилган фойдали қазилмалар бўйича келишув қазиб олиш жараёни хавфсизлигини таъминлаш учун қўшин юбориш имкониятини ҳам ўз ичига олади. Бу ҳақда NBC News ҳукуматдаги тўртта манбага таяниб хабар берди.
Телеканал суҳбатдошлари келишувнинг америкача вариантида Қўшма Штатлар Украинадаги ноёб ер металлари захираларининг ярмини олиши кўзда тутилгани ҳақидаги маълумотни ҳам тасдиқлади.
АҚШ молия вазири Скотт Бессент 12 февраль куни Киевга ташрифи чоғида келишув лойиҳасини Украина президенти Володимир Зеленскийга топширган.
14 февраль куни Зеленский келишувни имзолашдан «мулойимлик билан бош тортганини» хабар қилди. Reuters манбасига кўра, Украина келишувнинг ўз версиясини тайёрлаб, Америка томонига тақдим этган.
АҚШ президенти Доналд Трамп Американинг Киевга кўрсатган ёрдами эвазига Украинадан 500 миллиард долларлик ноёб тупроқ металларини олмоқчи эканини бир неча бор айтган эди. Шу билан бирга, Трамп Россия ва Украина ўртасида тинчлик битими муваффақиятли тузилиши мумкинлигидан қатъи назар, Қўшма Штатлар Украинанинг табиий ресурсларига кириш ҳуқуқига эга бўлиши кераклигини таъкидлади. Зеленский, ўз навбатида, Украина кўрсатилган ёрдам эвазига Ғарб ҳамкорлари билан биргаликда фойдали қазилмаларни қазиб олишга қарши эмаслигини айтди.
14 февраль куни WSJ АҚШ вице-президенти Жеймс Вэнс интервьюсини эълон қилди. Унда Вэнс агар Россия президенти Владимир Путин тинчлик шартномасига рози бўлмаса, Украинага Америка қўшинларини юборишни истисно этмади. Бироқ, интервью эълон қилинганидан сўнг, Вэнс ўз сўзлари бузиб талқин этилганини айтди. «Америка кучларига ҳеч қачон Америка манфаатлари ва хавфсизлигини таъминламайдиган жойда зарар етказилмаслиги керак. Бу уруш Россия ва Украина ўртасида», деди у.
Ctrl
Enter
Хато топдИнгизми
Иборани ажратиб Ctrl+Enter тугмасини босингМавзуга оид янгиликлар
