Путин Пасха муносабати билан 30 соатлик оташкесим эълон қилди

Россия президенти Владимир Путин Украина билан урушда Пасха байрами муносабати билан 30 соатлик оташкесим эълон қилди. Бу ҳақда у РФ қуролли кучлари бош штаби бошлиғи Валерий Герасимов билан учрашувда маълум қилди.

“Гуманитар нуқтайи назардан, бугун соат 18:00 дан бошлаб, якшанбадан душанбага ўтар кечаси – соат 00:00 гача Россия томони Пасха танаффусини эълон қилади. Бу вақт давомида барча ҳарбий ҳаракатларни тўхтатишни буюраман”, – деди Путин.

Россия президенти Украина томони “Россиядан намуна олишига” умид билдирди. Шу билан бирга, у Россия қўшинлари эҳтимолий провокацияларга ва оташкесимнинг бузилишига тайёр туриши кераклигини таъкидлади.

Путин шунингдек, АҚШнинг можарони тинч йўл билан ҳал қилишга бўлган интилишини қўллаб-қувватлашини билдирди.

Украина томони ҳозирча ушбу ташаббусга муносабат билдирмаган.

Аввалроқ АҚШ президенти Доналд Трамп россиялик ҳамкасбидан Украинада ўт очишни тўхтатиш бўйича таклифига “шу ҳафта охиригача” жавоб олишни кутаётганини айтган эди.

Эслатиб ўтамиз, аввалроқ АҚШ воситачилигида Россия ва Украина ўртасида энергетика объектларига зарба бермаслик бўйича келишув бўлиб, у 18 мартдан 18 апрелгача давом этган эди. Мазкур муддат давомида икки томон ҳам келишувни бузганликда бир-бирини айблаб келган.

Сиз нима деб ўйлайсиз: 30 соатлик оташкесим – ҳақиқий танаффусми ёки навбатдаги стратегик маневр? «Замин»ни Telegram’да ўқинг!