Рим папаси Франциск 88 ёшида вафот этди: Ватиканда мотам эълон қилинди

Рим католик черкови раҳбари папа Франциск 2025 йилнинг 21 апрель куни эрталаб, ўзининг Ватикандаги қароргоҳи бўлган Каса-Санта-Мартада ҳаётдан кўз юмди. У 88 ёшда эди.

Папанинг вафоти ҳақидаги хабарни кардинал Кевин Фаррелл Ватикан телевидениеси орқали расман маълум қилди.

«Азиз биродар ва опа-сингилларим, бугун чуқур қайғу билан севикли ва муқаддас отамиз Францискнинг оламдан ўтганини маълум қилишга мажбурман. Рим епископи, папа Франциск бугун маҳаллий вақт билан соат 7:35 да Худо ҳузурига қайтди. У ўзининг бутун ҳаётини Худога ва черковга хизмат қилишга бағишлади. У бизни Инжилнинг юксак қадриятлари билан, айниқса камбағаллар ва жамиятнинг чекка қатламларига бўлган муҳаббат, садоқат ва жасорат билан яшашга ўргатди», – дейилади Vatican News порталида берилган хабарда.

Франциск (асл исми Хорхе Марио Берголио) 2013 йилнинг март ойида Рим папаси этиб сайланган ва католик черков тарихида Лотин Америкасидан чиққан илк раҳбар сифатида тарихга кирган эди. У саломатлиги сабабли тахтдан воз кечган Бенедикт XVI ўрнига папа этиб танланганди.

Папалик даврида Франциск ижтимоий адолат, табиат муҳофазаси ва камбағаллар ҳуқуқларини ҳимоя қилишни ўзининг асосий вазифаси сифатида белгилаб, бутун дунёда кенг танилган ва ҳурмат қозонганди.

2025 йилнинг феврал ойи ўрталарида папа Франциск бронхит ташхиси билан шифохонага ётқизилган. Кейинчалик унинг аҳволи ёмонлашган, икки томонлама пневмония аниқланиб, бир неча марта сунъий нафас олиш аппаратига уланишига тўғри келган. Кардинал Жанфранко Равази папалик вазифаларини бажариш билан боғлиқ қийинчиликлар юзага келган тақдирда Франциск тахтдан воз кечиши мумкинлигини таъкидлаган эди.

23 март куни папа Франциск 38 кун давомида шифохонада муолажа олгандан кейин Ватиканга қайтган. 20 апрел куни у Ватикандаги Авлиё Пётр майдонида йиғилган минглаб одамлар олдида сўнгги марта кўриниш бериб, уларни Пасха байрами билан самимий табриклаган эди.

Папа ўзининг сўнгги нутқида Ғазо секторида ҳарбий ҳаракатларни зудлик билан тўхтатишга, гаровда сақланаётган исроилликларнинг озод қилинишига ҳамда Ғазода яшовчи аҳолига инсонпарварлик ёрдами етказишга чақирган. Шунингдек, у Украинада давом этаётган можарога тўхталиб, барча томонларни «адолатли ва мустаҳкам тинчликка эришиш йўлидаги ҳаракатларни давом эттириш»га чорлаганди.

Папа Францискнинг вафотидан сўнг яқин кунларда янги папани сайлаш учун Ватиканда анъанавий конклав чақирилиши режалаштирилган. «Замин»ни Telegram’да ўқинг!