Шаҳбоз Шариф: “Ҳиндистонга сабоқ бердик, аммо минтақада тинчликни хоҳлаймиз”

Покистон бош вазири Шаҳбоз Шариф сўнгги геосиёсий таранглик фонида жамоатчиликка мурожаат қилди. У Ҳиндистонга қарши ўтказилган операцияни муваффақиятли, деб баҳолар экан, мамлакатининг ҳар доим тинчлик тарафдори эканини алоҳида таъкидлади.

“Биз душманга унутилмас сабоқ бердик. Лекин шунга қарамай, агрессияни қоралаймиз ва доим тинчликни афзал кўрамиз. Минтақамиз ҳам бошқалар каби ривожланган ва тинч бўлишини истаймиз. Буни эса тинчликсевар қўшничилик ва узлуксиз дипломатик ҳаракатлар билангина амалга ошириш мумкин”, — деди Шариф ўз баёнотида.

“Урушлардан наф йўқ, ечим — ҳамкорликда”

Бош вазир ўз нутқида Кашмир масаласига ҳам тўхталиб, унинг ечими минтақавий барқарорлик учун ҳал қилувчи аҳамиятга эга эканини таъкидлади. “Биз учта урушни бошдан кечирдик, лекин реал натижага эришмадик. Эндиликда эски йўллар билан эмас, янги ёндашув — мулоқот ва ҳамкорлик орқали муаммоларни бартараф этиш вақти келди”, — деди у.

Шариф ўз нутқида Ҳиндистон Покистон томонидан таклиф этилган халқаро терговни рад этганини ҳам танқид қилди. “Айнан шу ҳолат бизга 9 майдан 10 майга ўтар кечаси кескин қарор қабул қилишга мажбур қилди”, — деди у.

“Жавоб бериш керак эди – ва бердик”

Покистон бош вазирининг таъкидлашича, 10 май тонгги соат 02:30 да Бош штаб раҳбари унга Ҳиндистон Покистон ҳудудини баллистик ракета билан ургани ҳақида хабар берган. “У менга: ‘Жаноб бош вазир, душманга ҳеч қачон унутмайдиган жавоб қайтариш вақти келди’, деди”, — дея эслади Шариф.

Шу кечаёқ Покистон қўшинлари жавоб зарбасини йўлга қўйган ва тез орада Ҳиндистон томонидан оташкесим бўйича таклиф келган. “Бош штаб раҳбари менга: ‘Мақсадга эришдик, энди улар сулҳ сўраяпти’, деди. Мен эса: ‘Душман қийналиб, ўзи тинчлик сўраса, бундан яхши натижа бўладими?’ деб жавоб бердим”, — деди Шариф.

Zamin.uz таҳририятидан:
Покистон ва Ҳиндистон ўртасидаги навбатдаги қарама-қаршилик ва унга берилган жавоблар Жанубий Осиёдаги мураккаб хавфсизлик мувозанатига яна бир бор эътибор қаратишга сабаб бўлди. Шаҳбоз Шарифнинг бир томондан жасур, иккинчи томондан тинчликка чақирувчи баёнотлари эса минтақавий дипломатия учун муҳим сигнал ҳисобланади.

Сиз бу воқеаларни қандай баҳолайсиз? Тинчликка элтувчи йўл — куч билан эмас, мулоқот билан эмасми? «Замин»ни Telegram’да ўқинг!