Россияда мессенжер ва давлат хизматларини бирлаштирган илова яратилади

Россия Федерацияси Давлат думаси мамлакатда рақамли мулоқот ва давлат хизматларини бирлаштирувчи янги миллий платформа яратиш тўғрисидаги қонунни қабул қилди. Бу платформа нафақат оддий мессенжер вазифасини бажаради, балки фуқароларга давлат ва тижорат хизматларидан хавфсиз ва осон фойдаланиш имконини яратади. Мутасаддилар бу янгиликни Россиянинг рақамли суверенитети ва ахборот хавфсизлигини мустаҳкамлаш сари қўйилган муҳим қадам сифатида баҳоламоқда.

Янги платформа орқали давлат ва муниципал идоралар, турли даражадаги таълим муассасалари, бизнес ва фуқаролар ўртасида тўғридан-тўғри ва ҳимояланган рақамли мулоқот қилиш имкони яратилади. Бундан ташқари, фойдаланувчилар турли ариза ва ҳужжатларни электрон имзо орқали расмийлаштириши, шахсий маълумотларини, ёши ёки имтиёзларини тасдиқлаши мумкин бўлади. Шунингдек, янги рақамли платформада барча турдаги таълим хизматлари, мактаб ва олий ўқув юртлари чатлари ҳам жамланади.

Россия рақамли ривожланиш вазири Мақсут Шадаевнинг сўзларига кўра, ушбу тизим давлатнинг машҳур "Госуслуги" портали билан интеграция қилиниши ва мамлакатнинг катта аҳолиси учун янги қулайликлар яратиши мумкин. Шу муносабат билан, май ойи охиридаги баёнотларда бу илованинг “Max” деб номланган янги универсал платформаси асосида ишлаб чиқилиши кутилмоқда. Max — VK компанияси томонидан яратилган инновацион лойиҳа бўлиб, у мессенжер, ижтимоий тармоқ, қидирув тизими, электрон тўловлар, чипта брон қилиш, шифокор қабулига ёзилиш ва ҳатто озиқ-овқат буюртмаларини ўз ичига олади.

Журналистлар бу лойиҳани Хитойнинг машҳур WeChat иловасига ўхшатишмоқда. WeChat бутун дунёда кўп функцияли супер-илова сифатида танилган. Фойдаланувчилар унда мулоқот қилади, давлат хизматларидан фойдаланади, пул ўтказмалари амалга оширади ва ҳар кунлик турмуш учун зарур бўлган деярли барча хизматларга эга бўлади. Аммо, WeChat кўп бор цензура ва кузатувда айблангани ҳам қайд этилган.

Россиядаги янги рақамли хизмат платформаси эса, биринчи навбатда, ахборот хавфсизлиги ва шахсий маълумотларни муҳофаза қилишни устувор вазифа деб билади. Хавфсизлик хизмати ва махсус назорат органлари илованинг барча функциялари устидан мониторинг ўрнатади. Бундай ёндашув фуқароларнинг шахсий маълумотларини ҳимоя қилиш, рақамли суверенитетни таъминлаш ва рақамлаштириш жараёнини тезлаштиришга хизмат қилади.

Қабул қилинган қонунга кўра, давлат хизматларидан фойдаланувчилар энди барча зарур ҳужжатларни ягона илова орқали тасдиқлайди, электрон идентификация, ёш ва имтиёзларнинг автоматик аниқланиши, онлайн консултациялар ва кўплаб қулайликлардан фойдаланиш имконига эга бўлади. Тизим, айниқса, масофавий таълим, онлайн бизнес ва электрон ҳукумат йўналишида катта самара беради, деб кутилмоқда.

Шундай қилиб, Россияда мессенжер, ижтимоий тармоқ, давлат ва тижорат хизматларини бирлаштирган янги рақамли платформа яратиш ғояси амалга ошмоқда. Бу лойиҳа мамлакатнинг ахборот майдонида янги босқични бошлаб бериши, фуқаролар ҳаётида эса катта ўзгаришларни олиб келиши мумкин. «Замин»ни Telegram’да ўқинг!