Украинанинг пойтахти Киев шаҳрида 10 июль куни эрталаб отиб ўлдирилган СБУ полковниги Иван Вороничнинг қотиллари йўқ қилинди. Бу ҳақда Украина хавфсизлик хизмати раҳбари Василий Малюк расмий баёнот берди.
Малюк маълум қилишича, Воронични нишонга олган шахслар Россия ФСБсининг махсус тайёргарлик кўрган агентлари бўлган. Уларнинг гуруҳи аёл ва эркакдан иборат бўлиб, Украинага олдиндан жўнатилган ва Киевда бир неча кун давомида полковникнинг кун тартиби ва ҳаракат йўналишларини кузатган.
Тергов маълумотларига кўра, улар қотиллик арафасида ФСБ куратоpидан тўппонча яширилган жойнинг координаталарини олган ва сўнг отишни амалга оширган. Воронич уйидан чиқиб кетаётганида, унга яқин келган қотил беш марта ўқ узган ва содир этилган жиноятдан сўнг ҳужумчилар Киев вилоятида яширинишга уринган.
«Қидирув ва контрразведка ҳаракатлари натижасида душманнинг жойлашган манзили аниқланди. Улар қўлга олиниш вақтида қаршилик кўрсатди ва ўт очилди. Шундан сўнг, улар йўқ қилинди», — дея баёнот берди СБУ раҳбари Малюк.
Унинг сўзларига кўра, махсус операция пайтида ҳужумчилар яширинган манзил аниқланиб, у ерда тўқнашув юз берган. Баёнот чоғида тарқатилган видеокадрларда Малюкнинг орқасида ҳодиса жойи ва автомашиналар, шунингдек, ерда ётган жасадлар ҳам акс этган.
Эслатиб ўтамиз, 50 ёшли Иван Воронич 10 июль куни тахминан соат 09:00 да уйидан чиқиб кетаётган пайтда тўппонча билан отиб ўлдирилган эди. Украина оммавий ахборот воситалари ёзишича, отишдан кейин қотил ҳодиса жойидан қочиб кетган. Полковник олинган оғир жароҳатлар оқибатида воқеа жойида вафот этган.
Бу воқеа Украинада хавфсизлик тизимига қарши ташқи таҳдидлар кескинлик касб этаётганини яна бир бор исботлади. Махсус хизматлар томонидан тезкор чора кўрилгани эса мамлакат ичидаги хавфсизликни таъминлашда жиддий ёндашув мавжудлигини кўрсатди. «Замин»ни Telegram’да ўқинг!
Ctrl
Enter
Хато топдИнгизми
Иборани ажратиб Ctrl+Enter тугмасини босинг Мавзуга оид янгиликлар
