Мелания ҳар куни Россия ҳақида бақиради – Трамп позициясини ўзгартирди

Америкада Дональд Трампнинг ташқи сиёсатдаги кайфияти ҳам сезиларли ўзгаришга учраётгани кузатилмоқда. Шунинг сабаби эса анча ғайриоддий – у ҳам бўлса, унинг рафиқаси Мелания Трамп.

Республикачи партия вакили Дон Беконнинг таъкидлашича, Мелания Трамп ҳар куни эр-хотин муносабатларидан ташқари, сиёсий масалаларда ҳам фаол иштирок этмоқда.

Беконга кўра, Мелания айнан Россиянинг Украинага йўллаётган доимий ракетали зарбалари ҳақида Трампга мунтазам равишда гапириб, унинг фикрларини қайта кўриб чиқишга мажбур қилмоқда.

“Унинг гапларидан сўнг, Трамп аввалги сўзларига нисбатан ўзгариш қиляпти. Энди у Москвага ультиматум қўйиб, 50 кун ичида зарбаларни тўхтатишни талаб қилмоқда”, — дейди Дон Бекон.

Аввалроқ Дональд Трамп Россия ҳақида нисбатан юмшоқ баёнотлар билан чиқиш қилган, ҳатто айрим ҳолларда Москва билан яқин алоқаларни тиклашга ҳаракат қилгани учун танқидларга учраган эди. Аммо Меланиянинг шахсий таъсири, кўринадики, у бундай ёндашувни тўхтатишга мажбур қилган.

Маълумотларга кўра, Мелания Трамп бу мавзуни кундалик тартибга айлантириб, ҳар куни эрталаб эридан Украинадаги воқеликка реакция талаб қилади. У Россиянинг зўравон ҳаракатларини қоралаб, бу масалада бетараф қолмаслик кераклигини таъкидламоқда.

Сиёсий кузатувчилар бу ҳолатни ноодатий, аммо таъсирли деб баҳоламоқда. “Агар АҚШ президенти ўз сиёсатини хонадондаги босим туфайли қайта кўриб чиқса, бу демократик жараёнда шахсий муносабатлар қай даражада таъсир қиларини кўрсатади”, — дейди Вашингтондаги таҳлилчилардан бири.

Айни пайтда, Трампнинг Россияга нисбатан позициясидаги ўзгариш, унинг хатти ҳаракатлари ва гап-сўзларида ҳам акс этмоқда. У энди Кремлни фаол равишда танқид қилмоқда ва можарога барҳам бериш учун қатъий позицияда эканини кўрсатмоқда.

Кузатувчиларга кўра, Меланиянинг шахсий фикри нафақат оила, балки бутун мамлакат ташқи сиёсатини шакллантираётган бўлиши мумкин. Бу эса Америка тарихида камдан-кам кузатиладиган ҳолатлардан бири бўлиши эҳтимолдан холи эмас.

Мавзуга оид янгиликлар ҳамон қизиқиш уйғотмоқда. Бу кетишда Меланиянинг “ички фронтдаги” таъсири янада кўпроқ сезила бошлаши мумкин. Шундай экан, АҚШ ташқи сиёсатида “биринчи хоним омили” янги даврни бошлаши мумкин. «Замин»ни Telegram’да ўқинг!