Украинадаги уруш майдонларида Россия томонида иштирок этган ўзбекистонлик фуқарога суд томонидан ҳукм ўқилди. Унинг тақдири жамоатчилик орасида турли муҳокамаларга сабаб бўлмоқда.
Маълумотларга қараганда, 24 ёшли йигит 2024 йил октябрь ойида иш излаб Россияга йўл олган. Бироқ у ерда қонуний ишга жойлашиш ўрнига, Россия Мудофаа вазирлиги билан ҳарбий хизматга оид шартнома имзолаган ва натижада Украинадаги уруш ҳаракатларида фаол иштирок этган.
Суд томонидан у Ўзбекистон Республикаси Жиноят кодексининг 154-моддаси, 1-қисмига асосан айбдор деб топилди. Мазкур моддага кўра, чет элда ҳарбий ҳаракатларда ёлланма тарзда иштирок этган шахсларга нисбатан қаттиқ жазо белгиланган.
Суд қарорининг матнида қуйидагича қайд этилган:
– Ушбу фуқарога 4 йил муддатга озодликни чеклаш жазоси тайинлансин.
Таъкидлаш жоизки, Ўзбекистон қонунчилигида «ёлланиш» деб аталувчи жиноят учун 5 йилдан 10 йилгача озодликдан маҳрум этиш каби қаттиқ жазо турлари назарда тутилган. Суд бу ҳолатда озодликни чеклаш билан кифояланган бўлса-да, бу фуқаро эркин ҳаракатланиши ва яшаш жойини ўзгартириш ҳуқуқидан маҳрум бўлади.
Айни пайтда, мазкур ҳолат нафақат ҳуқуқий, балки ахлоқий жиҳатдан ҳам жамиятда кўплаб саволларни келтириб чиқармоқда. Нима учун ёшлар хорижга иш излаб чиқиб, бегона урушларда ҳаётини хатарга қўймоқда? Уларга етарли маълумот ва тушунтириш ишлари олиб борилаяптими?
Бу воқеа бутун жамият учун жиддий сабоқ бўлиши керак. Ёшларимизнинг ҳаётини асраш ва уларни шундай хатарли йўллардан огоҳ этиш барча мутасадди идоралар ва жамоатчиликнинг умумий вазифасига айланмоғи зарур. Чунки бир инсон тақдири – бутун миллатнинг юзи, келажаги ва орзуларининг аксидир.
«Замин»ни Telegram’да ўқинг!
