АҚШнинг энг йирик ва гавжум шаҳарларидан бири — Нью-Йорк марказида кеча тун янграган отишма шаҳар аҳли ва сайёҳларни ҳайратга солди. Машҳур Таймс-сквер майдонида 9 августга ўтар кечаси содир бўлган ҳодиса кўпчилик учун тўсатдан ва қўрқувли лаҳза бўлди.
Отилган ўқлар натижасида 18 ёшли қиз, 19 ёшли йигит ва 65 ёшли эркак турли даражадаги жароҳатлар олди. Маълум қилинишича, қизнинг бўйнига ўқ яқиндан тегиб ўтган, йигитнинг ўнг оёғи, кекса эркакнинг эса чап оёғи яраланган.
Полиция ҳодиса жойига тез етиб бориб, гумонланувчини қўлга олди. Ҳар учala жабрланувчи ҳам тез ёрдам орқали Белвью шифохонасига етказилган ва ҳозирда уларнинг аҳволи барқарор деб баҳоланмоқда.
Гувоҳлардан бири журналистларга ҳодиса вақтида унинг олдида турган автомашина ёппасига тешилганини, ойналарида эса ўқ излари пайдо бўлганини айтган. Бу эса ҳодиса қандай куч билан содир бўлганини янада тасдиқлайди.
Ижтимоий тармоқларда тарқалган видеоларда “Hard Rock Cafe” ёнида юрган одамлар ўқ овозлари янграгандан сўнг югуриб қочаётгани акс этган. Яна бир видеода эса ерда ётган ярадор йигит шифокорлар томонидан тез ёрдам машинасига олиб кетилаётгани кўриниб туради.
Таймс-сквердаги ушбу тунги фожиа шаҳарда хавфсизлик чораларини янада кучайтириш зарурлигини кўрсатмоқда. Нью-Йорк полицияси ҳозирда тергов ишларини олиб бормоқда, гумонланувчининг мақсади ва ҳодисага олиб келган сабабларини аниқлашга ҳаракат қилмоқда.
«Замин»ни Telegram’да ўқинг!
