Британиянинг машҳур актрисаси ва сценаристкаси Эмма Томпсон Локарно кинофестивалида 1998 йилдаги ноодатий воқеани эслаб ўтди. Унинг сўзларига кўра, ўша пайтда “Асосий ранглар” фильми суратга олиш жараёнида трейлерда телефон жиринглади ва трубкада Дональд Трамп ўзини таништирган.
Трамп актрисани ўзининг “ажойиб жойларидан бирида” кечки овқатга таклиф қилган. Томпсон таклифни мулойимлик билан рад этиб, кейин алоқага чиқмасликка қарор қилган.
Актриса ўша пайтда ажрашиш арафасида бўлганини айтди ва Трампнинг ўз талабига мос аёлларни излаб топиш билан шуғулланадиган одамлари бўлиши мумкинлигини қайд этди. Бу воқеани у шўхлик билан “сталкинг” деб атади.
Томпсон ҳазил тариқасида: “Агар рози бўлганимда, эҳтимол, АҚШ тарихи бошқача йўналиш олган бўларди”, — деб қўшимча қилди.
