АҚШ президенти Доналд Трамп яқин кунларда жаҳон сиёсий саҳнасининг энг долзарб мавзулари бўйича фаол мулоқотларни бошлаши кутилмоқда. 13 август куни у Европа мамлакатлари етакчилари ҳамда Украина президенти Володимир Зеленский билан телефон орқали алоқа қилади. Бу ҳақда NBC News телеканали ўз манбалари орқали маълум қилди.
Маълумотларга кўра, ушбу мулоқот Зеленскийнинг Европа давлатлари вакиллари билан ўтказадиган музокараларидан сўнг амалга оширилиши режалаштирилган. АҚШ етакчисининг қўнғироғи Украина президентининг халқаро ҳамкорлари билан фикр алмашганидан кейин йирик сиёсий мазмундаги мулоқотга айланиши мумкин.
Шунингдек, манбалар таъкидлашича, Зеленский кейинчалик Киевни қўллаб-қувватловчи Европа Иттифоқи мамлакатлари, Буюк Британия ва Канада вакиллари билан ҳам алоҳида музокаралар ўтказиши режада бор. Бу учрашувлар Украина атрофидаги вазият ва унинг келажак истиқболларига доир муҳим қарорлар қабул қилинишида ҳал қилувчи омиллардан бири бўлиши мумкин.
Энг асосий воқеалардан бири эса 15 август куни кутилмоқда. Шу санада Доналд Трамп Аляскада Россия Федерацияси президенти Владимир Путин билан юзма-юз учрашув ўтказиши режалаштирилган. Ушбу мулоқотда энг кўп муҳокама қилинадиган масала — Украинадаги қуролли тўқнашувни тўхтатиш ва тинчликка эришиш йўлларини излаш бўлиши айтилади.
Халқаро таҳлилчилар фикрича, Трамп ва Путиннинг Аляскадаги учрашуви жаҳон сиёсий кун тартибида муҳим бурилиш нуқтасига айланиши мумкин. Бу мулоқотнинг натижалари нафақат Украина, балки бутун Европа хавфсизлиги учун катта аҳамиятга эга бўлади.
Яқин кунларда бўлиб ўтадиган ушбу сиёсий жараёнлар барча халқаро оммавий ахборот воситалари ва таҳлилчиларнинг диққат марказида бўлиб турибди. Экспертлар эса воқеалар ривожини катта қизиқиш билан кузатмоқда.
«Замин»ни Telegram’да ўқинг!
