Россияда ҳайратланарли тиббий ҳолат қайд этилди. Нижний Новгород шаҳрида яшовчи бир эркак бошига узунлиги 12 сантиметрлик улкан мих кириб кетишига қарамай, тирик қолди. Бу воқеа шифокорлар томонидан ҳақиқий мўъжиза сифатида баҳоланмоқда.
Маълумотларга кўра, жарроҳлар операцияни нейрохирургия бўлими мудири Александр Лавренюк ва тажрибали шифокор Павел Смирнов раҳбарлигида амалга оширишган. Амалиёт уч соатдан зиёд давом этган бўлиб, мутахассислар беморнинг бош суягидан михни эҳтиёткорлик билан олиб ташлашга муваффақ бўлишган.
Операциядан кейин беморнинг аҳволи оғир бўлган. У шифохонада жами 53 кун даволанди, шундан 40 куни реанимация бўлимида кома ҳолатида ўтган. Табибларнинг қатъиятли саъй-ҳаракатлари ва узоқ реанимация чоралари натижасида эркак ҳаётга қайтарилди.
Ҳозирда бемор реабилитация жараёнидан ўтмоқда. Дастлабки маълумотларга кўра, у жисмоний ҳолати барқарор бўлиб, секин-аста кундалик ҳаётга қайтмоқда. Шифокорлар эса бу ҳолатни нафақат тиббий муваффақият, балки кучли ирода ва ҳаёт учун курашнинг ёрқин намунаси сифатида баҳоламоқда.
Мутаҳассислар таъкидлашича, мих каби қаттиқ предметнинг бош суягидан ўтиши кўп ҳолларда инсон ҳаётини йўқотишга олиб келади. Бироқ бу ҳолатда кутилмаган мўъжиза юз берди — ҳаётий муҳим аъзолар зарарланмаган ва жарроҳларнинг профессионал иши беморнинг ҳаётини сақлаб қолди.
Табиийки, бу воқеа нафақат Россия, балки бутун дунё тиббиёти тарихида ўзига хос мисол бўлиб қолиши мумкин.
«Замин»ни Telegram’да ўқинг!
