Ғазода инсонпарварлик инқирози тобора оғирлашмоқда. Чоршанба куни кечаси Италия ҳукумати ташаббуси билан Пиза шаҳрига эвакуация қилинган 20 ёшли Мара Абу Зуҳри шифохонага ётқизилганидан 48 соат ўтмай вафот этди. Бу ҳақда маҳаллий ОАВ хабар тарқатди.
Маълумотларга кўра, ёш қиз Италияга оналик ҳамроҳлигида келган ва Пиза университети клиникасида даволанаётган пайтда юрак хуружи сабабли ҳаётини йўқотган. Шифокорлар унинг тана оғирлиги ва мушак массаси кескин йўқолганини, узоқ вақт давомида етарли овқатланмаганини қайд этган.
БМТ эса Ғазодаги вазият юзасидан жиддий огоҳлантириш бермоқда. Экспертлар ҳисоботларида ҳудудда очарчиликнинг «энг ёмон сценарийси» амалга оширилаётгани таъкидланмоқда. Бироқ Исроил ҳукумати бу иддаоларни рад этиб, гуманитар ёрдамни етказиб беришда БМТ агентликларини айбламоқда.
Италия ҳозиргача Ғазодан 180 дан ортиқ болалар ва катталарни қабул қилди. Улар орасида оғир жароҳатлар, туғма касалликлар ёки ампутациялардан азият чекувчилар бор. Шу ҳафтада яна 31 нафар бемор ва уларнинг ҳамроҳлари Рим, Милан ва Пизага жойлаштирилган.
Шу билан бирга, Британия парламенти вакиллари ҳам ҳукуматни зудлик билан Ғазодан болалар ва ярадорларни эвакуация қилиш дастурини амалга оширишга чақирди. Уларнинг айтишича, бу борада кечиктириш инсон ҳаёти учун оғир оқибатларга олиб келиши мумкин.
Ҳозирда Исроил Ғазо шаҳридаги аҳолини «хавфсиз ҳудудлар»га кўчириш режасини бошлаганини маълум қилди. Бироқ мунтазам ҳаво ҳужумлари, артиллерия зарбалари ва кучли бомбардимонлар туфайли, айниқса Зайтун туманидаги аҳвол «ҳалокатли» даражага етгани айтилаяпти.
Ғазо соғлиқни сақлаш вазирлиги хабарига кўра, сўнгги зарбалар натижасида камида 36 киши ҳалок бўлган. Шунингдек, яна 11 нафар инсон очарчиликдан ҳаётидан айрилган.
Исроил ҳарбийлари эса «тинч аҳоли орасида қурбонларни камайтиришга интилаётгани»ни таъкидлаб, Ҳамас назоратидаги манбалар берган рақамларнинг ишончлилигига шубҳа билан қарайди. Шу билан бирга, улар гуманитар инқироз учун жавобгарликни Ҳамас ҳаракати зиммасига юкламоқда.
Мутахассислар эса бу каби фожеали воқеалар Ғазодаги аҳвол қанчалик оғир ва ҳалокатли эканини яна бир бор кўрсатаётганини айтишмоқда.
«Замин»ни Telegram’да ўқинг!
