Россия Федерациясининг президенти Владимир Путин Украина президенти Володимир Зеленскийга Москвада учрашув ўтказишни таклиф қилди. Бу ҳақда Agence France-Presse (AFP) агентлиги манбаларига таяниб хабар тарқатмоқда.
Агентлик маълумотига кўра, Путиннинг бу таклифи АҚШ президенти Доналд Трамп билан 18 август куни бўлиб ўтган телефон мулоқоти чоғида билдирилган. Музокаранинг мазмунига кўра, Трамп, Зеленский ва Европа давлатлари раҳбарларининг Оқ уйдаги учрашуви давомида Путин билан учрашувнинг ўтказилиши масаласи муҳокама қилинган.
AFP манбаларига кўра, Украина президенти Зеленский мазкур таклифни рад этган. Унинг фикрича, Москвада учрашув ўтказишнинг имконсизлиги ҳақида аниқ қарор қабул қилинган.
Шунингдек, Доналд Трамп Зеленский билан музокаралар ўтказиш ва Путин билан қўнғироқ орқали уларнинг учрашувини ташкиллаштириш учун тайёргарлик бошланганини маълум қилган.
Бундан ташқари, Франция президенти Эммануэл Макрон учрашувнинг Женевада бўлиши мумкинлигини таъкидлади. Халқаро жиноий суднинг аъзоси бўлган Швейцария ҳукумати эса Путинга сафар давомида дахлсизлик беришга тайёрлигини расман эълон қилди. Швейцария ташқи ишлар вазири Иняцио Кассиснинг билдиришича, "муайян шароитларда" Путинга Швейцарияга ташриф буюришга рухсат берилади. Унинг тушунтиришича, ўтган йилда Швейцария ҳукумати халқаро ҳибсга олиш ордери остида бўлган шахсларга иммунитет бериш қоидаларини белгиланган.
Ғарб нашрларида учрашувнинг ўтказилиши мумкин бўлган бошқа жойлар қаторида Рим ва Будапешт шаҳарлари ҳам тилга олинмоқда.
Россия томони Путиннинг Украина президенти билан учрашувга розилик билдирганини расман тасдиқламаган. Президент ёрдамчиси Юрий Ушаков фақатгина Путин ва Трамп ўртасида Россия ва Украина ўртасидаги икки томонлама музокараларнинг даражасини ошириш ғояси муҳокама қилинганини айтиб ўтган.
«Замин»ни Telegram’да ўқинг!
