Испаниянинг Аликанте вилоятига қарашли Гуардамар дел Сегура шаҳрида кутилмаган воқеа юз берди. Шаҳарнинг машҳур пляжларида сув остида заҳарли ва ноёб денгиз мавжудоти — “Glaucus atlanticus”, халқ орасида “мовий аждаҳо” деб аталадиган кичик шиллиққурт пайдо бўлгани ҳақида маҳаллий ОАВ ёзди. Бу ҳақида CNN нашри ҳам маълум қилди.
20 август куни Гуардамар полицияси ўз ижтимоий тармоқ саҳифасида расмий эълон берди. Унда айтилишича, аҳоли ва сайёҳлар хавфсизлигини таъминлаш мақсадида шаҳар соҳилларида вақтинчалик тарзда сузиш ман этилди. “Мовий аждаҳо” пайдо бўлгани сабабли барча пляжлар ёпилади ва фақат янги кўрсатмалардан кейин қайта очилади”, – дейилган баёнотда.
Аслида, ушбу жонзотнинг номи унинг ташқи қиёфаси билан боғлиқ. Чунки кўриниши афсонавий аждаҳога ўхшаб кетади. Унинг узунлиги бор-йўғи 3 сантиметрни ташкил этади, аммо заҳарли хусусиятлари туфайли жуда хавфли ҳисобланади. Олимлар маълумотига кўра, “мовий аждаҳо” ўзидан бир неча баробар катта денгиз ҳайвонларини еб, уларнинг заҳарини ўз танасида тўплайди ва кейин ундан фойдаланиб, ўзидан 300 марта катта бўлган ўлжасини ҳам фалаж ҳолатга келтира олади.
Полиция огоҳлантиришича, бу шиллиққурт билан контактга киришиш инсон терисида кучли куйиш ва оғриқларга олиб келиши мумкин. Шу боис, маҳаллий аҳоли ва сайёҳлар қум устида ёки сувда ноодатий жонзотни кўрса, унга тегмасликлари лозим.
Шаҳар мэри Хосе Луис Саес ҳам аҳолини жуда эҳтиёткор бўлишга чақирди:
“Унга ҳатто қўлқоп билан ҳам тегманг. Агар кимдир чақиб олса, таъсирланган жойни дарҳол шўр сув билан ювиш ва тиббий ёрдамга мурожаат қилиш керак”, – деди у.
Бир неча кундан сўнг пляжлардаги тақиқ олиб ташланди ва сувга киришга рухсат берилди. Бироқ маҳаллий ҳокимият ва мутахассислар ҳануз эҳтиёт чораларига қатъий амал қилиш кераклигини уқтирмоқда.
Маълумот учун, Аликанте вилояти Испаниянинг энг машҳур сайёҳлик ҳудудларидан бири ҳисобланади. У қуёшли иқлими, соф қумли пляжлари ва қояли соҳиллари билан миллионлаб сайёҳларни ўзига жалб қилади. Аммо “мовий аждаҳо”нинг пайдо бўлиши бу йўналишдаги туризмга ҳам таъсир кўрсатиши мумкин.
Қайд этилишича, мазкур шиллиққурт одатда Атлантика, Тинч ва Ҳинд океанларининг илиқ сувларида учрайди ва улар оқим ҳамда шамол таъсирида ҳаракатланади. Ўрта Ер денгизида эса унинг кўриниши жуда кам ҳолат ҳисобланади. Шунинг учун Гуардамарда “мовий аждаҳо” пайдо бўлиши табиатшунослар учун ҳам ноодатий воқеа сифатида баҳоланди.
«Замин»ни Telegram’да ўқинг!
