АҚШ Конгрессига номзод Валентина Гомес оловпуркагич билан Қуръони Каримни ёқиб юборди, деб хабар берди “Timeline Daily”.
Техас штатидаги Республикачилар партияси номзоди бўлган Гомес видеода қўлида оловпуркагич тутган ҳолда муқаддас Китобни ёқиб юбориши кўринади. Роликда у Техасда ислом дини “бутунлай тугатилиши керак”лигини ҳам таъкидлаган.
Гомес АҚШ Конгресси Вакиллар палатасига Техаснинг 31-округидан сайловга қўшилмоқда. У мусулмонларни “христиан давлатларига зўравонлик орқали таҳдид солаётганликда” айблаб, тарафдорларини уни қўллаб-қувватлашга чақираётгани қайд этилган.
Видеоролик ижтимоий тармоқларда катта норозилик уйғотди. Жамоатчилик ва ҳуқуқшунослар Гомеснинг ҳаракатини диний эътиқод эркинлигига таҳдид ва нафрат қўзғатувчи хатти-ҳаракат сифатида баҳолашмоқда. Ушбу воқеа АҚШда диний эркинлик ва қонун доирасида кенг муҳокамаларни бошлаб берди.
Эслатиб ўтамиз, шунга ўхшаш воқеа аввалроқ Франциянинг Вийёрбан шаҳрида ҳам содир бўлган эди: номаълум шахс масжиддан Қуръони Каримни ўғирлаб, уни ёқиб юборган. Бу ҳолатлар халқаро миқёсда диний бағрикенглик ва тинчлик мавзуларини янада долзарб қилади.
«Замин»ни Telegram’да ўқинг!
