Россиянинг Красноярск вилояти Курагинский туманидаги “Артёмовский рудник” конида 26 август куни ҳалокатли воқеа содир бўлди. Вилоят прокуратураси хабар беришича, 30 ёшли ўзбекистонлик эркак тоғ массаси босиб қолиши оқибатида ҳодиса жойида вафот этган.
Дастлабки маълумотларга кўра, марҳум Ўзбекистон фуқароси меҳнат патенти асосида қимматбаҳо металлар қазиб олиш билан шуғулланувчи “Артёмовский рудник”да бурғулаш ишларини олиб борган. Ушбу ишлар тоғ жинсларини кейинчалик мустаҳкамлаш учун амалга оширилган. Шу пайтда, номаълум сабаблар туфайли тоғ қисми кенгликдан қулаб тушган ва ишчи жинслар остида қолиб кетган. Олган жароҳатлари оқибатида у воқеа жойида ҳалок бўлган.
Ҳодиса юз берган вақтда кон одатдаги режимда фаолият олиб борган ва ер остида jami 48 киши бўлган. Бошқа ишчиларга ҳеч қандай жароҳат етмаган. Ҳозирда ҳалокат содир бўлган ҳудудда хавфсизлик постлари ўрнатилган, барча ҳаракатлар назорат остида.
Красноярск вилояти прокуратураси иш берувчига нисбатан меҳнатни муҳофаза қилиш ва саноат хавфсизлиги қоидаларига риоя қилиш бўйича текширув ўтказишини маълум қилди. Бу жараёнда вилоят меҳнат инспекцияси ҳамда Ростехназорат мутахассислари жалб қилинган. Шу билан бирга, жиноят иши қўзғатиш масаласи ҳам кўриб чиқилмоқда.
Маълумот учун, “Артёмовский рудник” қимматбаҳо металларни қазиб олишга ихтисослашган бўлиб, унда ишчи хавфсизлиги ва техника қоидаларига қатъий риоя этилиши талаб қилинади. Бу фоҷиали воқеа нафақат оиласи учун оғир зарба бўлди, балки меhnат муҳофазаси ва саноат хавфсизлиги масалаларида эътиборни янада оширди.
«Замин»ни Telegram’да ўқинг!
