АҚШ ҳукумати арзон импорт маҳсулотлари учун амал қилиб келган бож имтиёзини бекор қилди. Энди 800 долларгача бўлган буюртмалар ҳам божхона текширувидан ўтади ва бож тўланади. Бу тартиб 29-августдан кучга кирган.
Ўтган йили АҚШга 1,4 миллиарддан ортиқ посилка бождан озод қилинган эди. Мутахассисларнинг айтишича, янги тартиб нархларнинг ошишига ва харидорлар танловининг камайишига олиб келади. Айниқса, кичик бизнеслар бундан кўпроқ зарар кўради.
Бу имтиёз асосан Shein ва Temu каби Хитой интернет-дўконлари томонидан қўлланилган. Лекин АҚШ ҳукумати бу қоида суистеъмол қилинганини ва ҳатто ноқонуний товарларни олиб киришда ишлатилганини таъкидламоқда.
Янги тартиб кучга кириши билан кўплаб халқаро почта хизмати АҚШга жўнатмаларни вақтинча тўхтатиб қўйди. Бу эса харидорлар учун кечикишларга ва айрим маҳсулотлар танқислигига сабаб бўлмоқда.
Мутахассислар фикрича, яқин вақт ичида нархлар ошади. Шунингдек, Хитой компаниялари АҚШдаги омборлари орқали савдони давом эттириши кутилмоқда.
«Замин»ни Telegram’да ўқинг!
