55 ёшли Танг Вейхуа 26 йилдан буён бедарак йўқолган фарзандини излашда тиним билмайди. Унинг 1999-йилда тўрт ёшида олиб кетилган ўғли Ван Лейни топиш учун аёл энди янги қадамга борди — Шанхайдаги ўз квартирасини мукофот сифатида таклиф қилди. Бу ҳақда South China Morning Post хабар берди.
Тангнинг сўзларига кўра, ушбу квартира ўз ўғлининг марҳум бобосига тегишли бўлиб, унинг энг катта орзуси неварасини яна бир бор кўриш эди. Унинг фикрича, бу таклиф кимдир ҳақиқатан ҳам ёрдам беришга тайёр бўлган шахсни руҳлантириши мумкин.
Шанхайда кўчмас мулк бозори жуда қиммат, бир квадрат метр учун нархлар одатда 100 минг юандан (ёки 14 минг АҚШ доллари) бошланади. Танг ва турмуш ўртоғи фарзандини топиш учун бу пайтгача қарийб 4 миллион юан (560 минг доллар) сарфлашган, аммо умиддан қолмай, ҳар йили фарзандини топишга ҳаракат қилишда давом этмоқда.
Болани ўғирлаб кетган шахс, Лу фамилияли эркак, 1999-йилда қўлга олинган ва умрбод қамоқ жазосига ҳукм қилинган. Аммо унинг яхши хулқи туфайли 2022-йилда озодликка чиқиши мумкин бўлган. Танг ундан нафратланса-да, ҳар йили уни ва оиласини кузатиб, фарзандининг тақдири ҳақида озгина бўлса ҳам маълумот олишга умид қилган. Аммо ҳалигача берган маълумотлари самара бермаган.
Хитой ҳукумати 2021-йилда йўлга қўйилган “Туанюан” (“Қайта учрашув”) дастури орқали юзлаб олиб кетилган болалар аниқланган. Бу ташаббус фуқароларни, агар уларнинг фарзандлари ҳақида шубҳалари бўлса, полицияга ДНК намуналарини топширишга ундайди.
Тангнинг тинимсиз изланишлари интернет фойдаланувчилари орасида катта ҳаяжон ва эътибор уйғотди. Фойдаланувчилардан бири изоҳ қолдириб, шундай деди: “Фарзандингизни топиш учун барча имкониятингизни ишлатдингиз. Илтимос, ўзингиз ҳам соғлом ва бахтли бўлишга ҳаракат қилинг. Қаерда бўлишидан қатъи назар, ўғлингиз сиз учун фақат яхшилик умид қилади”.
Танг Вейхуа ҳамиша умидни йўқотмай, фарзандини топиш учун барча йўлларни синамоқда. Бу воқеа нафақат Хитойда, балки бутун дунёда юракларини эзиб, инсонларга умид ва сабрнинг қимматини яна бир бор эслатади.
«Замин»ни Telegram’да ўқинг!
