Покистоннинг шимолий ҳудуди яна бир фожиали воқеага гувоҳ бўлди. 1 сентябрь куни эрталаб Гилгит-Балтистон вилоятида ҳарбий вертолёт қулаши оқибатида беш нафар киши ҳаётдан кўз юмди. Бу ҳақида маҳаллий нашрлар, жумладан Dawn хабар тарқатди.
Маълумотларга кўра, ҳодиса соат 10:00 атрофида Чилас шаҳри яқинида юз берган. Вертолёт Гилгит-Балтистон ҳокимиятига тегишли бўлиб, у янги учиш-қўниш йўлагига қўнишга уринган пайтда техник муаммолар сабаб қулагани тахмин қилинмоқда.
Воқеа жойига зудлик билан полиция ва қутқарувчилар етиб борди. Бироқ афсуски, бордда бўлган беш нафар ҳарбий хизматчи тирик қолмади. Улар орасида командир майор Атиф, қўмондон майор Фаисал, парвоз муҳандиси наиб субедар Мақбул, экипаж раҳбари ҳавалдар Жаҳонгир ҳамда наик Амир бўлгани маълум қилинди.
Расмийлар ҳозирда ҳалокатнинг аниқ сабабларини ўрганмоқда. Дастлабки тахминларга кўра, техник носозлик асосий омил бўлиши мумкин. Тергов ишларига ҳарбий ва маҳаллий идоралар жалб этилган.
Гилгит-Балтистон маъмурияти расмийси Файзулла Фарак ҳам воқеа юзасидан изоҳ бериб, қурбонлар оилаларига ҳамдардлик билдирди. Шунингдек, ҳодисадан кейин вертолёт парвозлари вақтинча тўхтатилгани айтилади.
Шу тариқа, Покистондаги ушбу фожиа мамлакатда хаво хавфсизлиги ва ҳарбий техниканинг техник ҳолати масалаларини яна бир бор кун тартибига чиқарди. Экспертлар бундай воқеалар хавфсизлик тизимларини кучайтириш ва замонавий парвоз технологияларини жорий этиш зарурлигини таъкидлашмоқда.
«Замин»ни Telegram’да ўқинг!
