Инсон организмининг имкониятлари ҳали тўлиқ кашф этилмаганига яна бир далил пайдо бўлди. Хитойлик олимлар инсон танасидан чиқадиган иссиқликдан электр энергиясини олиш имконини берувчи янги технологияни намойиш этди. Бу ҳақида “South China Morning Post” нашри маълум қилди.
Мутахассислар “термоэлектр каучук” деб номланган эластик материални яратишди. У яримўтказгичли полимер ва каучук асосида ишлаб чиқилган бўлиб, инсон танаси ҳароратини электр қувватига айлантиради.
Олимларнинг фикрича, бу материал яқин келажакда ҳаётимизда катта ўзгаришлар ясаши мумкин. Масалан, ақлли соат ёки қулоқчинларни махсус розеткасиз, фақат тана иссиқлиги орқали зарядлаш мумкин бўлади. Шунингдек, электр тармоғи мавжуд бўлмаган шароитларда телефон ёки бошқа гаджетларни қувватлантиришда қўл келиши эҳтимол қилинмоқда.
Технологиянинг қўлланиш соҳаси фақат шу билан чегараланмайди. Олимлар келгусида мазкур материални “ақлли кийимлар”га интеграция қилишни режалаштирмоқда. Бундай кийимлар нафақат гаджетларни қувватлайди, балки инсон танаси ҳароратини ҳам мувофиқлаштиришга ёрдам бериши мумкин.
Қизиғи, материалга турли сенсорларни жойлаш имкони ҳам бор. Бунинг натижасида у босимни ўлчаш, кимёвий моддалар таркибини аниқлаш ёки нафас олиш жараёнини кузатиш каби вазифаларни бажаради. Мутахассислар айтишича, бундай сенсорлар нафақат саломатлик мониторингида, балки вирусларни аниқлаш ёки ўпка саратони ташхисида ҳам қўлланиши мумкин.
Хитой тадқиқотчилари таъкидлашича, бу материал асосида яқин келажакда ақлли ниқоблар ҳам ишлаб чиқилиши мумкин. Улар инсоннинг нафас олиш тизимини кузатиш билан бирга, турли касалликларни эрта босқичда аниқлашга ёрдам беради.
Шу тариқа, “термоэлектр каучук” номли ушбу кашфиёт энергия манбаларига янги қараш олиб кириши ва соғлиқни сақлаш соҳасида ҳам янги имкониятлар эшигини очиши мумкин.
«Замин»ни Telegram’да ўқинг!
