Сурияда узоқ йиллик танаффусдан сўнг илк нефть экспорти амалга оширилди. Энергетика вазирлиги маълумотича, мамлакатнинг ички эҳтиёжларидан ортиқ қолган қазилма бойликлар халқаро бозорга йўналтирилган.
Тартус порти орқали юборилган 600 минг баррель хом нефть Nissos Christiana танкерига юкланиб, халқаро савдо компанияси B Serve Energyга топширилди. Расмийлар бу жараённи Сурия энергетика инфратузилмасини синовдан ўтказувчи муҳим босқич сифатида баҳоламоқда.
Энергетика вазирлиги вакили Риёд ал-Жубаси таъкидлашича, экспорт учун юборилган нефть мамлакатдаги конлардан қазиб олиниб, Банияс ва Ҳомс заводларида қайта ишланган. Унга кўра, бу амалиёт Суриянинг ишлаб чиқариш салоҳияти тикланаётганидан далолат беради.
Сурия нефть транспорт компанияси раҳбари Маан Паша ҳам экспортнинг қайта йўлга қўйилиши узоқ йиллик тўсиқлардан кейин соҳада муҳим бурилиш бўлиши мумкинлигини қайд этди. Унинг фикрича, мазкур юк ташиш нафақат иқтисодий жиҳатдан аҳамиятли, балки транспорт ва порт инфратузилмасининг қай даражада самарали ишлаётганини кўрсатиб беради.
Маълумот учун, 2011 йилгача Сурия кунига ўртача 380 минг баррель нефть сотарди. Бироқ фуқаролар уруши ва халқаро санкциялар туфайли экспорт деярли бутунлай тўхтаб қолган эди.
Шу боис, бугунги амалга оширилган жўнатма нафақат иқтисодий эҳтиёжлар, балки бутун мамлакат учун стратегик аҳамиятга эга қадам сифатида баҳоланмоқда.
«Замин»ни Telegram’да ўқинг!
