Хитойда фан оламини ҳайратга солган навбатдаги катта кашфиёт рўй берди. Марказий ҳудудда жойлашган Цинлуншань қазилма қўриқхонасида олимлар тошга айланган тухум қобиғидан иборат ноёб топилмаларни аниқлади. CNN ёзишича, ушбу топилма 28 та тухумдан иборат бўлиб, уларнинг ёши тахминан 86 миллион йил экани ҳисоблаб чиқилди.
Мутахассислар маълум қилишича, топилган тухумларнинг кўпчилиги Dendroolithidae оиласига мансуб бўлиб, “Placoolithus tumiaolingensis” турига тегишли. Уларнинг шакли бироз яссиланган шар кўринишига эга, узунлиги 120–170 миллиметргача, қобиғининг қалинлиги эса 2,4 миллиметрдан ошмайди. Бу эса уларнинг ноёб геологик хусусиятларини кўрсатиб туради.
Олимлар санани аниқлашда “атом соати” деб аталадиган усулдан фойдаланишган. Яъни тухум қобиғидаги қўрғошин ва уран изотоплари ўлчаниб, уларнинг аниқ ёши ҳисоблаб чиқилган.
Тадқиқотчилар эндиликда ушбу техника нафақат ёшни белгилаш, балки динозаврларнинг совуқ иқлимга қандай мослашганини ўрганишда ҳам ёрдам беришидан умидвор. Чунки бу маълумотлар жуда қадимги турлар ҳаёти ҳақида янги қирраларни очиши мумкин.
“Биз топилмаларни жуда эҳтиёткорлик билан ўрганишимиз зарур. Бу жуда мураккаб жараён бўлиб, замонавий лаборатория ва юқори аниқликка эга асбоб-ускуналар талаб қилади. Энг муҳими, намуна бошқа моддалар билан ифлосланиб қолмаслиги керак”, — деди тадқиқот етакчиси Би Чжао.
Мутахассислар фикрича, ушбу кашфиёт жаҳон палеонтологиясида муҳим босқич бўлиб, келгусида динозаврлар ҳаёти ва уларнинг муҳитга мослашуви ҳақида янги маълумотларни очиб бериши мумкин.
«Замин»ни Telegram’да ўқинг!
