Шимолий Кореяда инсон ҳуқуқлари билан боғлиқ жиддий муаммолар яна халқаро майдонда муҳокамага чиқди. Бирлашган Миллатлар Ташкилоти тарқатган сўнгги ҳисоботда қайд этилишича, мамлакатда хорижий, айниқса Жанубий Корея сериалларини тарқатган ёки томоша қилган фуқаролар оғир жазога тортилмоқда. Баъзи ҳолатларда эса улар суд ҳукми билан ўлим жазосига маҳкум этилгани маълум қилинди.
БМТнинг инсон ҳуқуқлари бўйича миссияси раҳбари Жеймс Хинан билдиришича, Шимолий Кореяда 2014 йилдан буён аҳоли устидан назорат кучайтирилган. Янги технологиялар орқали кузатув тизими жорий этилган ва айниқса COVID-19 пандемиясидан кейин жазо чоралари янада қаттиқлашган.
Таъкидланишича, нафақат сиёсий айбловлар, балки оддий ҳуқуқбузарликлар учун ҳам қатл этиш ҳолатлари сони сезиларли ошган. Бу эса халқаро ҳамжамиятда жиддий ташвиш уйғотмоқда.
Бироқ ҳисоботда айрим ижобий нуқталар ҳам қайд этилган: қамоқхоналардаги зўравонлик ҳолатлари маълум даражада камайган ва суд-ҳуқуқ тизимида кичик ислоҳотлар амалга оширилмоқда. Шунга қарамай, БМТ экспертлари мамлакатдаги болалар меҳнати муаммосидан қаттиқ хавотир билдирмоқда. Маълумотларга кўра, ўсмирлар хавфли саноат соҳаларида — кўмир шахталари, қурилиш ишлари ва махсус “зарбдор бригадалар”да мажбурий тарзда меҳнатга жалб қилинаётгани кузатилган.
Халқаро ҳуқуқ ҳимоячилари бу ҳолатни инсон ҳуқуқлари билан боғлиқ энг жиддий қонунбузарликлардан бири сифатида баҳоламоқда. Мутахассислар Шимолий Корея ҳукуматини қатл жазосини бекор қилишга, мажбурий меҳнатни тўхтатишга ва инсон қадрини устувор қиймат сифатида тан олишга чақирмоқда.
«Замин»ни Telegram’да ўқинг!
