Бразилиянинг собиқ президенти Жаир Болсонару яна соғлиғи билан боғлиқ муаммолар туфайли шифохонага ётқизилди. Бу ҳақда унинг ўғли Флавио Болсонару ўзининг X (собиқ Twitter) ижтимоий тармоғида маълум қилди.
Унинг сўзларига кўра, 16 сентябрь куни кечга яқин отаси ўзини ёмон ҳис қилган. Хусусан, унда ҳиқичоқ кузатилган, қон босими кескин пасайган ва кўнгил айниши кучайган. Шу боис уни полиция назоратида DF Star клиникасига олиб боришган. Флавио бу ҳолатни “фавқулодда ҳолат” деб атаган.
Болсонарунинг турмуш ўртоғи — собиқ биринчи хоним Мишель Болсонару ҳам ўз баёнотида эриннг бир қатор тиббий текширувлардан ўтганини ва ҳозирда томир орқали укол олаётганини маълум қилди.
Эслатиб ўтамиз, ўтган ҳафтада Жаир Болсонару давлат тўнтаришини режалаштирганликда айбланиб, суд томонидан 27 йилу 3 ой муддатга озодликдан маҳрум қилиш жазосига ҳукм қилинган эди. Суд жараёнида собиқ президент 2022 йилги сайловларда мағлубиятга учраганидан сўнг ҳокимиятда қолиш учун конституцияга зид ҳаракатлар уюштиришга урингани айб сифатида кўрсатилган.
Болсонару эса ўз айбини рад этиб келмоқда. Унинг тарафдорлари ва адвокатлари бу суд қарорини сиёсий таъқиб сифатида баҳолашмоқда.
Жаир Болсонару Бразилия сиёсатининг энг баҳсли ва ўта ўнг қанот вакилларидан бири ҳисобланади. У 2019 йилдан 2022 йилгача мамлакатни бошқарган ва кейинги сайловда Лула да Силвадан мағлубиятга учраган. Сиёсатчи мағлубиятини расман тан олмаган бўлса-да, лавозимини тарк этган.
2023 йил январь ойида эса унинг тарафдорлари сайлов натижаларидан норози бўлиб, Бразилия пойтахтида оммавий намойишлар ва тартибсизликлар уюштирган. Улар ҳатто ҳукумат биноларини босиб олишга уринишган, бу эса бутун дунёда катта шов-шувга сабаб бўлган.
Собиқ президент соғлиғи билан боғлиқ қийинчиликларни аввал ҳам кўп маротаба бошдан кечирган. У етти йил аввал сайловолди кампанияси пайтида пичоқланганида оғир жароҳат олган ва шундан бери бир неча марта шифохонага ётқизилган.
«Замин»ни Telegram’да ўқинг!
