Ҳиндистонда юз берган жон сақрашга арзийдиган воқеа бутун жамоатчиликни ҳаяжонга солди. BBC ёзганидек, 20 кунлик чақалоқ тириклайин кўмилган ҳолда топилган.
Маълумотларга қараганда, чақалоқни оддий қўйбоқар чўпон тасодифан топиб олган. У тупроқ остида келаётган йиғини эшитиб, яқинлашганда ер остидан чақалоқнинг қўли кўриниб турганини пайқаган. Шу заҳоти у қишлоқ аҳолисини чақирган, кейин эса полицияга хабар берилган.
Ҳуқуқ-тартибот органлари ходимлари болани қазиб олиб, дарҳол шифохонага етказишган. Шифокорлар унинг аҳволи оғир эканини айтган: чақалоқ бутунлай тупроққа беланган, оғзи ва бурнига қум кириб, нафас олиш қийинлашган. Унинг танасида ҳашарот чақиши, ҳатто ҳайвон ҳужуми излари ҳам топилган.
Бир кеча-кундуз давомида аҳволи бироз яхшилангани кузатилган бўлса-да, кейин инфекция сабаб ҳолати яна ёмонлашган. Табиблар сўзларига кўра: “Прогноз ижобий эмас, лекин биз уни қутқариш учун бор имкониятни ишга солмоқдамиз”.
Ҳозирча полиция чақалоқнинг ота-онасини топа олмаган, тергов ишлари олиб борилмоқда.
Мутасаддилар таъкидлашича, бундай ҳолатлар Ҳиндистонда кўпинча ўғил болага бериладиган устунлик билан боғлиқ. Қиз фарзанд айрим оилаларда иқтисодий юк сифатида кўрилади. Ҳуқуқ ҳимоячилари ҳисоб-китобига кўра, мамлакатда миллионлаб қизлар туғилмасидан олдин аборт орқали йўқ қилинган ёки чақалоқ пайтида ўлдирилган.
Қонунга кўра, бола жинсини туғилмасдан олдин аниқлаш тақиқланган бўлса-да, яширин клиникалар ҳали ҳам ишлаётгани айтилади.
Эслатиб ўтамиз, 2019 йилда ҳам шунга ўхшаш ҳолат содир бўлган — муддатидан олдин туғилган қизалоқ сопол идишга солиниб, тириклайин кўмилган, аммо вақтли қутқариб қолинган эди.
«Замин»ни Telegram’да ўқинг!
