Камчатка яримороли яна бир бор табиий офат билан юзма-юз келди. АҚШ Геология хизмати маълумотларига кўра, 18 сентябрь куни Петропавловск-Камчатский шаҳри яқинида 7,8 магнитудали зилзила қайд этилди. Офат эпицентри шаҳардан тахминан 128 километр узоқликда, океан қаърида 10 километр чуқурликда жойлашган.
Зилзиладан кейин Америка метеорологлари эҳтимолий цунами хавфи ҳақида огоҳлантириш берди. Шундан сўнг Камчатка ўлкаси губернатори Владимир Солодов барча хизматлар юқори тайёргарлик режимига ўтказилганини маълум қилди. Унинг таъкидлашича, маҳаллий сейсмологлар магнитудани 7,2 деб баҳолаган ва яриморолнинг шарқий соҳилида цунами хавфи эълон қилинган.
Ҳозирча қурбонлар ёки катта вайронагарчилик ҳақида маълумот келиб тушмади. Бироқ қутқарувчилар жамоат бинолари ва тураржой уйларини тезкор тарзда кўздан кечиришни бошлаган. Маҳаллий аҳолига эҳтиёт чораларига қатъий амал қилиш тавсия этилмоқда.
Мутахассислар таъкидлашича, Камчатка табиий сейсмик фаол ҳудуд бўлиб, у ердаги аҳоли ҳар қандай фавқулодда ҳолатга тайёр ҳолда яшашга мажбур. Бундай кучли зилзилалар нафақат инфратузилмага хавф туғдиради, балки одамларнинг руҳий ҳолатига ҳам кучли таъсир кўрсатади.
Шу боис маҳаллий ҳокимият органлари барча эҳтимолий хавфларни олдини олиш, аҳолини эвакуация қилиш ва қулай шароит яратиш учун барча чораларни кўраётганини маълум қилди.
«Замин»ни Telegram’да ўқинг!
