Марказий Осиё шаҳарлари орасида яшаш учун энг қиммат ҳудудлар рўйхати эълон қилинди. “Numbeo” портали жорий йилнинг биринчи ярми якунлари асосида тайёрлаган рейтингга кўра, Қозоғистоннинг Олмаота шаҳри минтақа бўйича энг қиммат шаҳар сифатида қайд этилди.
Индекс ва ўринлар
Ҳисоботда қайд этилишича, Олмаота яшаш қиймати индексида 29,4 пункт билан жаҳон бўйича 346-ўринни эгаллаган. Бу кўрсаткич уни нафақат Қозоғистон, балки бутун Марказий Осиёда етакчига айлантирди.
Рейтингда бошқа шаҳарлар ҳам ўрин олган:
-
Қирғизистон пойтахти Бишкек — 26,8 индекс билан 364-ўринда;
-
Қозоғистоннинг бошқа йирик шаҳри Остона — 26,5 пункт билан 366-ўринда;
-
Ўзбекистон пойтахти Тошкент эса 26,2 индекс билан 370-ўринда қайд этилди.
Тожикистон ва Туркманистон шаҳарлари бу галги ҳисоботда киритилмаган.
Тошкентдаги яшаш харажатлари
Портал келтирган маълумотларга кўра, Тошкентда 4 кишилик оиланинг уй-жой ижарасисиз ўртача ойлик харажатлари тахминан 23 миллион 39 минг сўмни ташкил этади. Ёлғиз яшовчи шахс учун эса бу кўрсаткич 6 миллион 437 минг сўм атрофида.
Шу билан бирга, Тошкентда яшаш қиймати Нью-Йорк билан солиштирилганда 72,2 фоиз арзонроқ экани таъкидланган (уй-жой ижараси ҳисобга олинмаган ҳолда). Ижара нархлари борасида эса фарқ янада катта: Тошкентда уй-жой ижараси Нью-Йоркдагидан ўртача 84,5 фоиз арзон.
«Замин»ни Telegram’да ўқинг!
