Буюк Британияда эълон қилинган Good University Guide 2026 рейтинги илк бор тарихий воқеага гувоҳ бўлди. 32 йил давомида доим етакчи учликда жой олиб келган Оксфорд ва Кембриж университетлари бу йил кучли учликдан чиқиб кетди. Бу ҳолат таълим дунёсида катта баҳс ва қизиқиш уйғотди.
Янги етакчилар
Рейтингга кўра, Лондон Иқтисодиёт ва Сиёсат фанлари мактаби (LSE) иккинчи йил кетма-кет биринчи ўринни эгаллашга муваффақ бўлди. Унинг ортидан Сент-Эндрюс университети иккинчи, Дарем университети эса учинчи ўринни қўлга киритди.
Шу билан, Оксфорд ва Кембриж кучли тўртталикка кириш билан чекланди. Илгари камида биттаси ҳар доим учликдан ўрин олиб келгани боис бу йилги натижа тарихий бурилиш сифатида қайд этилди.
Дарем ва LSEнинг ютуқлари
Дарем университети бу йил “Йил университети” деб эътироф этилди. LSE эса “Академик самарадорлик бўйича йилнинг энг яхши университети” ҳамда “Рассел гуруҳи университети” номинацияларида ғолиб бўлди. Бу натижалар мазкур муассасаларнинг таълимдаги кучли салоҳияти ва самарадорлигини яна бир бор намоён қилди.
Рейтинг мезонлари
Тузилган рейтингда таълим сифати, талабалар тажрибаси, илмий изланишлар даражаси, барқарорлик кўрсаткичлари ва битирувчиларнинг ишга жойлашиш имкониятлари инобатга олинди. Шу билан бирга, олийгоҳлар томонидан таклиф этилаётган қўшимча стипендиялар, грантлар ва талабалар учун қулай шарт-шароитлар ҳам муҳим мезон сифатида баҳоланди.
Мутахассислар фикри
Таҳлилчиларга кўра, етакчи университетларга кириш жараёни янада рақобатли бўлиб бормоқда. Шу билан бирга, талабаларнинг уйга яқинроқ таълим олишни танлаши айрим университетлар учун янги имкониятлар эшигини очмоқда. Бу эса таълим тизимида янада кучли рақобат ва янги шароитларни юзага келтириши кутилмоқда.
«Замин»ни Telegram’да ўқинг!
