Франция президенти Эммануэл Макрон Ню-Йоркда бўлиб ўтаётган БМТ Бош ассамблеяси юбилей сессияси олдидан жаҳон ҳамжамияти диққатини ўзига қаратди. Унинг баёнотида АҚШ президенти Доналд Трампнинг Россияга нисбатан тонлари сезиларли даражада ўзгаргани алоҳида қайд этилди.
«Мен Америка президентининг Украинанинг нафақат чидамлилик, балки бизнинг сафимизда ўз ҳуқуқлари ва ҳудудий яхлитлигини ҳимоя қилиш қудратига ишонаётганидан мамнунман», — деди Макрон ўз чиқишида.
Франция раҳбари шунингдек, Трампнинг Россия иқтисодиётининг сўниб бораётгани ва Москва қўшинлари орасидаги йўқотишлар ҳақида айтган фикрларини ижобий баҳолади. «1000 кундан ортиқ давом этаётган уруш давомида — минглаб қурбонлар ва тинч аҳоли жабрланишига қарамай, Россия Украина ерларининг атиги бир фоизини ўз тасарруфига олди», — дея қўшимча қилди у.
Шу куни Доналд Трамп ҳам жамоатчиликка мурожаат қилиб, Европа Иттифоқи ва НАТО кўмагида Украина ўз тарихий чегараларини қайтариб олишга қодирлигини таъкидлади. Бу ҳақда у Украина президенти Володимир Зеленский билан учрашувдан сўнг Truth Social саҳифасида эълон қилди.
«Вақт, сабр ва Европа, айниқса НАТОнинг молиявий кўмаги билан Украина ўзига тегишли барча ҳудудларни қайтариб олиши мумкин. Россия уч ярим йилдан буён уруш олиб бормоқда, аслида эса бундай ғалабани қўлга киритиш учун ҳақиқий кучли армияга бир ҳафта ҳам етарли бўларди», — деди Оқ уй раҳбари.
Бу баёнотлар ғарб давлатлари орасида бирдамлик кайфиятини янада мустаҳкамлади ва халқаро майдонда Россияга нисбатан сиёсий босимнинг кучайиши эҳтимолини янада оширди.
«Замин»ни Telegram’да ўқинг!
