1 сентябрдан бошлаб Сингапурда иситиладиган тамаки қурилмалари (ИҚОС ва бошқалар) ҳамда электрон сигареталар, айниқса К-подлар ва этимидат таркибли ваплар қонуний равишда тақиқланди. Бу ҳақда Ташқи ишлар вазирлиги матбуот хизмати маълум қилди.
Янги қонунга кўра, Сингапурда электрон сигареталар ва иситиладиган тамаки қурилмаларини олиб кириш, сотиш, эгалик қилиш ва улардан фойдаланиш қатъиян ман этилади. Ҳуқуқбузарлик ҳолатлари учун жазо тизими қуйидагича:
-
Эгалик қилиш ёки чекиш – 2000 сингапур долларигача жарима;
-
Сотиш ёки импорт қилиш – 10 000 АҚШ долларигача жарима ёки олти ойгача қамоқ; такрорий ҳуқуқбузарликларда 20 000 АҚШ долларигача жарима ва 12 ойгача қамоқ;
-
Такрорий ҳуқуқбузарликлар мажбурий реабилитация ва кейинчалик жиноий жавобгарликка олиб келиши мумкин.
Сингапур К-подс туридаги вапларни гиёҳванд моддалар билан боғлиқ қурилмалар деб ҳисоблайди. Этимидат расмий равишда С синфидаги дори сифатида рўйхатга олинган ва унинг эгалик қилиниши ёки фойдаланилиши қуйидагиларга олиб келиши мумкин:
-
Мажбурий назорат ва реабилитация дастури;
-
Такрорий жиноятлар – жиноий жавобгарлик.
Контрабанда учун 3–20 йилгача қамоқ ва 5–15 зарба; сотиш ва тарқатиш учун 2–10 йил қамоқ ва 2–5 зарба жазоси кўзда тутилган.
Қонун Сингапур фуқароларига ҳам, чет элликларга ҳам татбиқ этилади. Талабалар ва иш визаси эгалари ҳам жаримага тортилиши мумкин. Қонунни бузиш ҳибсга олиш, катта миқдордаги жарималар, депортация ва қайта киришни рад этишга олиб келиши мумкин.
Ўзбекистон фуқароларига Сингапурга электрон сигареталар ва К-подларни олиб кирмаслик қатъий тавсия қилинади. Бу чора тадбирлардан сўнг хориждаги туристлар ва меҳнатчилар учун ҳуқуқий хавфсизлик ва солиқ-маъмурий қоидаларга риоя қилишнинг аҳамияти яна бир бор кўрсатилди.
«Замин»ни Telegram’да ўқинг!
