Туркияда юз берган йўл-транспорт ҳодисаси юртдошларимизни изтиробга солди. Ижтимоий тармоқларда тарқалган маълумотларга кўра, Истанбул шаҳрида 17 ёшли Ўзбекистон фуқароси С.С. автоҳалокат оқибатида вафот этди. Мазкур ҳолат юзасидан Ўзбекистоннинг Истанбулдаги Бош консулхонаси расмий муносабат билдирди.
Маълум қилинишича, йигит жорий йилнинг 5 апрель куни содир бўлган ЙТҲда оғир тан жароҳатларини олган ва дарҳол шифохонага ётқизилган. Бир неча кун давомида шифокорлар унинг ҳаёти учун кураш олиб боришган бўлса-да, кўрсатилган барча тиббий ёрдамларга қарамай, афсуски, у 15 апрель куни вафот этди. Марҳумнинг жасади 17 апрель куни Самарқанд вилоятида дафн қилинган.
Ҳолат бўйича қўшимча тафсилотлар ҳам маълум қилинди. Маълум бўлишича, ЙТҲни содир этган Туркия фуқароси ҳодиса жойидан қочиб кетган, бироқ ордан бир кун ўтиб пушаймонлик билдириб, полицияга таслим бўлган. Текширувлар вақтида унинг қонида гиёҳванд моддалар мавжудлиги аниқланган. Шунга қарамай, айни пайтда у қамоққа олинмаган. Суд жараёни жорий йилнинг 2 октябрь кунига белгиланган.
Бош консулхона маълумотига кўра, марҳумнинг оила аъзолари ҳодиса содир бўлган пайтда консулликка мурожаат қилмаган. Ҳозирги вақтда дипломатик ваколатхона томонидан уларга зарур консуллик ва ҳуқуқий ёрдам кўрсатилмоқда.
Қизиғи шундаки, ижтимоий тармоқларда айни пайтда тарқалган хабарларда С.С. ни у туғилган кунида, онасига гул олиб қайтаётганида машина уриб кетгани ҳақида ҳам айтилади. Бу ҳолат юртдошларимиз орасида янада катта изтироб уйғотди.
Мутахассислар таъкидлашича, мазкур воқеа нафақат йўл хавфсизлигига оид муаммоларни, балки хорижда юртовдошларимиз ҳаёти ва ҳуқуқларини ҳимоя қилиш масалаларини яна бир бор кун тартибига олиб чиқмоқда.
«Замин»ни Telegram’да ўқинг!
